Cu documento y cifra den man ban papia di mentira y manipulacion --- *Na ningun pais liber na mundo Mike Eman lo a gana eleccion 2009 --- *Gobernantenan di AVP condena y e plan pa destrui alma financiero Aruba
ORANJESTAD (AAN) — Na e momentonan aki, Aruba atrobe ta pasa den turbulancia loke pa nos ta nada desconoci.
Ora mira atras riba sucesonan, analisa documentonan y cifranan di Aruba na siglo 21, asuntonan sumamente serio ta bini dilanti.
Na prome lugar por nota preferencia politico di cantidad di grupo, cu ta habri nan boca dependiente e gobierno cu ta mando pa malinforma e Arubiano di buena fe, cu pa ser hende honrado tin problema pa mira weganan barata cu ta tuma lugar.
Si kier pa awor aki Aruba ta trankil, pa na e momento aki Aruba por hala rosea, ta stop di mira bienestar di Aruba y ta ignora cifranan y documentonan cu ta entrega prueba di corupcion cu holor di cadaver putri di bienestar di Aruba.
Si kier pa awor Aruba ta trankil, ta baha gobierno pa pone un gobierno dirigi pa Mike Eman, cu asina ta haya oportunidad pa hunga rey chikito atrobe, mientras e ta zink Aruba.
Na ningun pais democratico, caminda tur dirigente di tur sector di comunidad tin deber di informa nan Pueblo a base di berdad y sin preferencia politico, Mike Eman por a haya oportunidad pa bira Prome Ministro di Aruba na 2009 y rementa e bom cu a destrui Aruba.
Mientras Mike Eman tabata prepara pa bay cumpra curazon di Aruba na 2009, riba un beach na Aruba, a yega na acuerdonan pa pone un fin na e caso di corupcion Fondo Desaroyo Nobo San Nicolaas, cu a horca e Ley di Contabilidad, cu ta defende e bon maneho di placa di e Pueblo di Aruba.
Rapport di Algemene Rekenkamer Aruba a duna prueba con Gobierno Henny Eman a atende cu placa di Aruba, cu a keda cubri cu berguensa.
Na cualkier pais na mundo lo tabata imposibel pa Mike Eman den e ambiente aki, presenta su mes como candidato pa bira dirigente di Aruba. Manipulacion a triunfa riba democracia na 2009, ora Mike Eman a pone cuchio na garganta di Aruba y a destrui Aruba cu el a ciega cu palabra.
For di 2009 Mike Eman a mata e bienestar financiero, economico, social di Aruba, pero tur instancia cu mester a habri nan boca y papia, a dicidi di mantene silencio.
Na 2013 no a resta mucho mas di Aruba. Pero Mike tabata sa con sunchi y brasa pa e por mantene e puesto di Napoleon Bonaparte na Aruba.
Hende politicamente manipula, ta bati man pa Mike, ta entrega voto na Mike na 2013, pa na 2014 Hulanda bin pone fin na fiesta y rescata bienestar di Aruba.
Berguensa loke a pasa na Aruba na 2014, ora como Prome Ministro, Mike a presenta e teatro di welga di hamber, pa Aruba no mira kico e tabata haci cu placa di Pueblo.
Un Aruba destrui a keda atras. Unda tur gremionan tabata pa preveni loke a pasa? Tur rapport di Aruba ta publico y tu gremio por analisa cifranan pa asina nan participa na buskeda di bienestar di e pais, cu silencio di demasiado hende, a permiti Mike Eman destrui cu mentira y un gobernacion pa destrui Aruba.
Awe den un situacion mundial sumamente dificil, Aruba mester sigui cana. Aparentemente e unico persona cu por dirigi Aruba ta Mike Eman, cu no tin berguensa di presenta su mes na e Pueblo cu el a masacra financieramente cu asistencia di su grupito cu a permiti Mike destrui Aruba pa awe e trata di haci come back pa asina atrobe e haya puesto y uza democracia pa hunga e rey chikito di Aruba.
