ORANJESTAD (AAN): Durante un conferencia di prensa tocante e reforma fiscal cu Gobierno ta bay introduci, presidente di Camara di Comercio (KvK) Monica Kock a papia riba inflacion.
“Un di e preocupacionnan cu nos tabata tin for di cuminzamento despues di e prome presentacion cu nos a haya tabata cu e calculacion di Gobierno ta cu e BTW lo trece un inflacion di 2.5%”.
Naturalmente nos a haci e calculacion y segun nos calculacion el a sali 10.5% .
Esaki kiermen cu e efecto di e BTW ta hopi mas grandi, compara cu locual Gobierno ta calcula, segun Kock.
El a duna e ehempel di ora BBO a wordo introduci na 2007 cu tabata pues di 3%, unda cu e inflacion tabata 10.2%.
“Si e ta 8% cu ta bay riba e producto, ora cu e producto yega Aruba for di Merca ya tin un otro 8% ta bay riba dje”.
Un cos hopi importante cu nos ta wak na e momentonan aki ta cu e prijsnan ta bay subi barbaramente door di e inflacion y e consecuencianan di e BTW.
For di comienzo nos a vocifera cu e porcentahe mester baha y no por ta e porcentahenan cu nan a presenta, pasobra nos no por carge, segun e presidente di KvK.
El a sigui bisa cu pa comercio tin algun cambio cu ta wordo haci cu no ta wordo papia hopi riba dje, cu tambe ta trece preocupacion.
Segun Kock, si bo ta doño di un negoshi (groot aandeelhouder direkteur), awor Gobierno ta bay dicidi kico bo salario ta.
E salario cu nan a pone ta 5000 florin.
“Esaki kiermen cu si bo tin bo negoshi chikito bo mester tin un salario di 5000 florin y esey den nos opinion por trece consecuencianan basta grandi pa negoshinan chikito”.
Nos a haci control y a tuma nota di e hecho cu 70% di e negoshinan na Aruba ta di 1 of 2 persona, pues e ta bay afecta esey, segun Kock.
