Region di Caribe ta expresa su cansancio den problema y mas problema
*Aumento di costo di bida ta uni na preparacion y resultado horcan
*Cambio di clima ta deshaci di oportunidad pa reconstrui daño
ORANJESTAD(AAN)—“Costo di bida a subi. Tur loke mester pa prevencion y pa enfrenta pasashi di un horcan, a conoce aumento di prijs. Esaki ta un peso extra,”ta bini dilanti.
Pa por cubri temporada di horcan for di tur angulo, DIARIO tin contacto na diferente parti di Region di Caribe y mundo pero tambe cu representantenan di diferente grupo.
Pa por presenta noticia, por atende cu informacionnan oficial cu ta drenta sigur. Pa por presenta e drama humano cu temporada di horcan ta representa, mester acudi cerca personanan cu for di momento cu temporada di horcan ta acerca, mester biba den estado di alerta.
Cansancio di horcan no solamente ta wordo provoca, sinembargo, pa e hecho cu atrobe e temporada a anuncia su mes.
Pa personanan cu ta biba na lugarnan conoce como ruta normal di horcan, e temporada ta nifica cu nan mester tene continuamente na mente, kico un horcan cu por haci cu nan existencia.
Den construccion di cas y edificio mester tene cuenta cu e peligernan di horcan. Horcannan grandi cu a azota comunidadnan a laga daño atras cu comunidadnan y famianan despues di hopi tempo no a logra cubri y continuamente ta mira nan esfuerso pa recuperacion, destrui pa otro manifestacion di e fenomeno di tempo.
“E situacion mundial di ultimo añanan sigur a crea un peso extra pa tur hende. Pandemia, inflacion, aumento di tur prijs, mal noticia y mas mal noticia di tur parti di mundo, ta crea un cansancio cu ta causa reaccion ora alarma pa horcan wordo bati,”un informante ta splica.
E ta preocupa pa e hecho cu na su isla, cu ta keda den e zona di peligro, por nota cu mas y mas hende no tin e forsa financiero, pero tampoco e forsa humano necesario pa sigui confronta peliger y problema.
“Nos ta cansa,”ta bini dilanti di hende cu nunca por a reconstrui loke horcan a destrui.
Kico e cansancio di horcan por nifica pa e region di Caribe?
E ta un peligro grandi manera expertonan ta divulga.
Antes mas hende ta prepara pa e momento cu un sistema tropical yega cerca, pero awe mas hende ta tuma riesgo cu ta sumamente peligroso manera a keda demostra na momento cu tormenta tropical Franklin a zak y sorprende Aruba algun tempo pasa.
“A keda proba cu Aruba ta den un region caminda horcan por pasa,” a bini dilanti na momento cu ariba Oceano Atlantico, na un forma rapido tormenta Lee tabata desaroya den un horcan, cu lo bira un horcan mayor.
E ruta cu Lee ta sigui te awor, no ta duna ningun indicacion cu tin peligro pa e region di Caribe, cu den e dianan aki ta biba den un situacion di tempo y calor.
Mas pa fin di siman ta contempla e disturbio na nivelnan mas halto cu por aumenta e oportunidad di yobida.
Juni, Juli y Augustus 2023 segun expertonan a kibra record di calor.
Cu entrada di September mester tene na consideracion cu e temporada di horcan ainda no a termina.
12 sistema tropical a haya nomber. E actividad produci pa e Oceano Atlantico cayente entre region di Caribe y Africa, a tene Aruba den estado di alerta na varios ocasion.
E proyeccion pa Lee ta cu e lo pasa pa Noord di region di Caribe, cu ta keda den estado di alerta den e temporada di horcan cu manera ya bisa den e panorama mundial ta crea cansancio di problema y mas problema cu directamente ta afecta bienestar y felicidad di hende.
