E resultado di lidernan carismatico Eman y Schotte pa Reino
- Na 2013 debe nacional Aruba a crece den un aña cu 11 porciento
- 2010 a bira inicio di final di autonomia na Aruba y Curacao
ORANJESTAD(AAN)- December 2007. Mundo ta cay den un recesion, cu ta afecta tur pais na mundo.
Hulanda y e paisnan Hulandes den Caribe cu tabata e tempo Aruba y Antia Hulandes, ta experencia problemanan cu ta exigi medida.
Reforma di belasting ta introduci OB y BBO na e dos paisnan cu ta cera conoci cu lidernan politico carismatico, cu tin e don di haci pueblo kere cu nan ta papia berdad.
Na Juni 2009, oficialmente e recesion ta termina pero ya Aruba ta den gara di Mike Eman, cu a haci uzo di e occasion pa priminti cu e lo baha BBO cu mitar y asina a gana curazon di e Pueblo y cambia destino di Aruba en todo caso te awe.
Gerrit Schotte, cu a nace den e partido MAN di Curacao, ta presenta su propio partido pa eleccionnan cu lo determina kende lo bira Prome Ministro di e pais nobo, Curacao dia 10 di October 2010.
Curacao ta den un situacion cu por compara cu Aruba na 1985, ora problemanan financiero causa pa economia mundial, a haci posibel pa e lider di Status Aparte, Betico Croes, wordo derota na eleccion y Henny Eman bira Prome Ministro despues di Status Aparte.
Final di 2010 ta conoce tanto Aruba como Curacao cu lidernan carismatico, cu a pone Reino drenta den accion pa nan gobernacion.
Na Curacao mundo politico mes no a duna Gerrit Schotte mucho tempo. For di momento cu el a duna prueba como Prome Ministro e no merece confiansa di Pueblo, su fin a wordo proclama.
Prome cu e mester a retira na 2012 ya el a sabi di crea un buraco financiero di 45 Miyon den e saldo 0 di debe y fayo riba presupuesto cu Hulanda a laga atras.
Cu un aanwijzing pa Curacao, su partido a manda su persona cas mientras autoridad a cuminsa atende cu e casonan di scandalnan mas grandi cu Curacao a yega di conoce.
Den e tempo aki na Aruba, Mike Eman como Prome Ministro di Aruba sigur tabata tin tur atencion di Reino, cu tabata pasa den un turbulencia politico.
Na varios ocasion DIARIO a cuestiona pakico Reino no a actua prome contra Mike Eman cu segun cifranan di 12 di December 2012 pa 12 di December 2013, a subi e debe nacional di Aruba cu 11 porciento loke a haci cu e debe nacional di Aruba a surpasa 330 Miljard.
Aki ta topa cu e raiz di problemanan di awe cu Reino Hulandes ta exigi condicionnan pisa di Aruba y Curacao pa mehora nan situacion financiero.
Durante e epoca di 2010 pa 2013, tanto Aruba como Curacao a bira desastre gubernamental sigur riba tereno financiero, loke a nifica imposicion di medidanan di Hulanda, supervision, pa a scapa e paisnan di caida total.
Na Curacao, Gerrit Schotte mester a bay cas pa despues bay prison.
Na Aruba, Mike Eman a “retira” despues cu el a rementa e volcan financiero di Aruba na 2017 pa na 2020 den e pandemia bolbe pa critica e trabou cu el a laga atras como Ministro Presidente, cu ta e desastre financiero di Aruba.
Expertonan ta insisti cu mester tuma medida contra situacionnan manera e Gobierno Mike Eman a crea, cu ta destruccion financiero di Aruba a proposito, pasobra a destrui entrada di e pais y a bay crea debe pa e pais, cu a wordo seriamente herida financieramente entre 2010 y 2017.
Na 2014 Mike Eman como Prome Ministro mester a actua manera Reino a exigi a base di un Aanwijzing no pa placa cu a bay pa sindicatonan pero pa placa cu a wordo derocha pa medio di un maneho cu a bay contra ley.
DIARIO hunto cu expertonan lo sigui trece prueba pa Pueblo di Aruba di e situacion cu a desaroya den Reino, caminda Curacao y Sint Maarten no tin e base cu Aruba tin pa yega na culminacion di e reforma den Reino.
“Lidernan carismatico cu sa con pa uza Pueblo, ta e problema mas serio di democracia,” expertonan ta declara ora nan entrega e realidad di e periodo 2010 pa awe na DIARIO.
