Dia 13 di October venidero
ORANJESTAD (AAN) Diaranzon mainta, a tuma lugar un conferencia di prensa yama pa Departamento di Salud Publico, relaciona cu e Expo Salud “Promoviendo salud y bienestar” cu lo tuma lugar dia 13 di October, pa DVG, conhuntamente cu Plataforma Promocion di Salud, y Ministerio di Salud.
Señora Jurette Croes, Relacionista Publico di DVG, a hiba palabra pa duna informacion na prensa y comunidad, y alavez pa extende un invitacion na un y tur pa atende e interesante expo-salud aki.
“Esaki ta e di tres aña consecutivo cu e ta wordo organiza, y e aña aki un bez mas y ta priminti bira mas grandi cu aña pasa. Nos ta bay tin dia 13 di October, y lo tuma lugar na Renaissance Convention Center. E entrada y parkeo ta completamente gratis. E lo cuminza desde 10’or di mainta, te cu 4’or di atardi. Ta bay tin hopi actividad, y esey ta e motibo cu nos tin diferente organizacion presente, pa cada un por bisa kico ta locual nan ta bay ofrece na comunidad, e dia aki 13 di October, p’asina aki nos invita henter comunidad, tur edad por yega!”, Jurette Croes, PR di DVG a duna di conoce.
