ORANJESTAD (AAN): Na 2023, Banco Central di Aruba (BCA) a establece e plataforma di pago yama ‘Foro di Pago Nacional’ (FPN),
cu ta dedica solamente na e topico di pago. E FPN ta trece tur stakeholder relevante hunto, esta e proveedornan y consumidornan di servicionan di pago.
E di dos conferencia di FPN a tuma luga dia 21 di november 2024. Casi 90 stakeholders a participa discutiendo varios topico relevante den e area di pago. E agenda a focus riba scams, fraude digital y inclusion financiero, cu keynote speakers y discusionnan di panel cu expertonan local y internacional.
Sr. Prakash Mungra, Director Ehecutivo y Presidente Interino di BCA, a habri e conferencia “Payment Matters: Navigating Financial Access and Fraud”, y a duna bon bini na e participantenan, sigui pa sra. Miriam Gonzalez, Presidente di e comision di FPN y Director Ehecutivo di BCA . Sra. Gonzalez a enfatisa entre otro cu: “Pago ta un necesidad fundamental den nos bida diario, mescos cu awa y electricidad. Pago ta implusa e economianan, ta conecta comunidadnan, y ta provee individuonan cu acceso na servicionan esencial. Sinembargo, mescos cu e utilidad aki a evoluciona durante añanan, asina tambe e complexidadnan riba acceso y seguridad di pago a aumenta. Esey ta precisamente e motibo pa nos enfoca awe riba scams, fraude digital, y inclusion financiero”.
Despues di esaki, sra. Penélope Tromp-Gomez, vice-presidente di e comision di FPN y Division Manager Payment Systems, Treasury & Banking Operations di BCA, a presenta e resultado di e encuesta “Scams and digital fraud in payments in Aruba”.
A tene e encuesta di 2 di October pa 23 October 2024, cu e resultado interesante cu scams y fraude ta parse di no ta hopi comun na Aruba ainda. Sinembargo, un grupo chikito di esnan cu a participa na e encuesta si a experencia incidentenan di scams of fraude relaciona cu nan pago varios biaha den e ultimo 12 lunanan.
Sra. Tromp-Gomez a enfatisa cu, aunke e resultadonan di e encuesta aki ta mayormente positivo, no tin espacio pa ta complaciente cu e situacion actual, pa motibo cu riesgonan di fraude financiero ta sigui aumenta. Tin ainda un grupo di individuonan vulnerabel den nos sociedad, specialmente adultonan mayor, cu merece mas proteccion, entre otro door di acerca nan y splica nan con pa haci uzo di pagonan electronico na un manera mas sigur.
Un di e momentonan importante di e evento tabata e presentacion di e Keynote Speaker, sr. Lawrence Zelvin, Head di e Financial Crimes Unit na Bank of Montreal Financial Group, titula “Lessons Learned on Digital Fraud – International Experience”. Sr. Zelvin a elabora riba e situacion global di fraude financiero. Despues di e presentacion a sigui e panel cu a trata dos pregunta interesante: 1. “Ki ta e reto principal pa combati scams y fraude digital den pago na Aruba?” y 2. “Con stakeholders por colabora pa efectivamente sigura y proteha pago di consumidornan?” Panelistanan sr. Roland Croes, Director di Setar N.V., sr. Pierre Rafini, Presidente di Aruba Bankers’ Association, y Dr. Kristel de Nobrega, Chief Information Security Officer, di BCA a duna nan opinion riba e preguntanan aki.
Despues di pauze, sr. Diogo Noguiera Cruz, Head di e Division for Financial Citizenship Promotion na Banco Central di Brasil, a duna un presentacion cautivador titula “Financial Inclusion – The Success Story of PIX in Brazil”.
Den su presentacion e la elabora riba e exito di PIX, cual ta e sistema di pago instantaneo uza na Brazil, crea y maneha pa Banco Central di Brasil, cu ta permiti transacionnan rapido y sigur 24/7 via telefon celular, QR code, of e manera unico di identificacion manera number di telefon. Despues di esaki, a sigui un otro discusion di panel cu expertonan di Aruba, Curacao y Surinam, kendenan a duna nan punto di bista riba e siguiente dos pregunta: 1. “Ki ta e reto principal pa promove inclusion financiero?” y 2.“Ki strategia mester implementa pa promove inclusion financiero den bo pais?” Panelistanan sr. G. Wever, Minister di Economia, Comunicacion y Desaroyo Sostenibel, Dr. Shekinah Dare, Manager Financial Stability Division na Banco Central di Curaçao y Sint Maarten, sr. Harry Dorinnie, Deputy Governor and Director of Monetary Affairs na e Banco Central di Surinam y sra. Elmelynn Croes, Senior Economist di BCA a elabora ampliamente teniendo na cuenta e situacion na nan pais. Tur e panelistanan ta di acuerdo cu mester bin cu mas iniciativanan pa promove inclusion financiero. Esaki ta necesario pa mehora comportacion social financiero y na momento di tuma decision den e comunidadnan cu nan ta representa, pa ora di cumpra productonan financiero y pa preveni debe excesivo.
E mainta a conclui cu palabranan di sra. Gonzalez, cu a gradici tur e participantenan den nomber di BCA y a reitera e importancia di colaboracion continuo entre e stakeholders pa fortifica sistemanan di pago na Aruba y promove inclusion financiero.
E di dos conferencia di FPN a conclui cu un yamada fuerte pa accion, mientras cu stakeholders a reafirma nan compromiso pa lucha contra scams y fraude digital, mientras ta sigui promove inclusion financiero na Aruba. Sra. Gonzalez tambe a informa e stakeholders cu e reunionnan di e Working Groups di FPN lo tuma luga otro aña na April of Mei 2025, mientras cu e di tres conferencia di FPN lo ta na November 2025.
