Jesseline Kelly, PR di DAS:
ORANJESTAD (AAN) – Siguiendo cu e tema di apoderamento, e Relacionista Publico di Departamento di Asunto Social (DAS), Jesseline Kelly, a indica cu e clientenan cu tambe por nombra un apoderado pa cobra nan placa di bijstand, ta e personanan cu ta wordo interna den un centro di rehabilitacion.
Esaki tambe tin su proceso pa cana, y den e caso aki, e centro di rehabilitacion ta esun cu ta bay cobra pa e cliente. Cada Centro di Rehabilitacion tin un persona di contacto cu ta cobra pa e Centro concerni. “E ta un sistema cu nos ta custumbra cune, pero e centro di rehabilitacion ta manda su carta cu e firma unda e cliente ta bay di acuerdo pa e instancia aki cobra p’e” Jesseline Kelly a relata.
E di cinco motibo pa nombra un apoderado ta ora un cliente ta wordo poni den curatela. “Cu e punto aki, nos ta confronta algun problema, pasobra hopi biaha nos departamento no ta na haltura cu un cliente a wordo poni bao curatela. Dus, tin biaha ta te ora cu e bijstand pega, cu e cliente no a cobra e bijstand anto ta wordo blokea, despues nos ta bin haya sa, despues cu e persona aki no ta apto mas pa cobra”, Jesseline Kelly a splica.
Despues, na momento cu e persona a wordo sentencia door di Huez como curator pa e persona. “Anto, ora bo sa cu e persona ta bao curatela, bin DAS cu e sentencia di Huez y bisa nos cu bo ta e curator pa e cliente y cu abo ta bay cobra e bijstand p’e. Si nos ta ripara cu pa un of otro motibo e curator no por bay cobra e bijstand, esaki por apodera un otro persona pa haci esaki. Pero si, nos ta pidi pa bin nos departamento, informa nos kico ta pasando, pa evita cu e bijstand ta wordo blokea pa despues no bin full un proceso di nobo pa e por cana su caminda corecto”, Jesseline a indica.
Jeselline Kelly a conclui reiterando cu Apoderamento di bijstand ta e tema di Luna di Maart y den tur tema nos ta pidi e persona pa mantene su mes na e rekisitonan y cualkier cambio cu ta bin durante e proceso si bo ta un apoderado, keda den contacto cu e seccion di Bijstand. Notifica cualkier cambio mesora, pa asina por evita cualkier sancion den futuro.
