Mundo politico mes mester cuminsa duna e bon ehempel pa otro sigui - *Ni Gobierno, ni Parlamento ni ciudadano por crea problema pa su pais -*Democracia ta mara na derechonan y responsabilidad reglamenta pa ley
ORANJESTAD (AAN) — E cambio mas grandi cu Pandemia a trece pa henter mundo, sigur ta e hecho cu el a habri wowo na realidadnan cu ningun hende kier a mira.
Covid-19 a deshaci di teorianan falso riba e sistema democratico cu te cu 2020 sigur pa un gran cantidad di hende, tabata fuente di un supuesto bienestar cu a wordo saca completamente for di su contexto.
Sin duda e pantaya falso di socialismo a aporta na e hecho, cu den democracia un cantidad grandi di ciudadano kier mira loke nan por saca for di e pais pa medio di e sistema politico.
Mester papia di un pantaya falso di socialismo, cu ta wordo presenta na publico como e cielo cu ta spera tur pober, pero realmente ta haci henter Pueblo pober y ta entrega Pueblo na e grupo cu tin poder y ta dicidi kico Pueblo hasta ta come tur dia.
Durante Siglo 20 ora mas pais nobo a wordo crea a base di e era di decolonolisacion y autonomia, por mira con socialismo a trata di uni cu democracia y un cantidad di ley social a desborda pa afecta normalidad democratico y crea problemanan pa e pais.
Na Aruba por mustra entre otro riba e forma cu a introduci AZV, cu a bira un imposicion cu a kita e derecho democratico di un ciudadano pa dicidi pa su mes riba e calidad di cuido medico.
Den e sistema aki, no ta e pueblo a gana pero sistemanan politico cu mester a garantisa cuido medico pa e diferente sectornan. A deshaci di e forma cu tabata atende cu cuido medico pa trahadornan y nan famia, pa e grupo di persona sin entrada of cu ya no por traha mas cu tabata e pakete social di Gobierno, y di e grupo cu tabata dicidi riba nan mes cual parti di nan entrada nan kier gasta na nan cuido medico pa medio di un seguro priva.
Loke a pasa ta, cu den cuido medico a deshaci di diversificacion y a crea un gigante cu den pandemia a bira incontrolabel y hasta ta menasa futuro di cuido medico na Aruba pasobra si e pais na cierto momento no por paga mas, mester introduci e sistema di contribucion di e segurado, loke lo basha henter e sistema social di AZV abou.
AZV ta uno di e ehempelnan bibo di politica iresponsabel, cu mester produci voto sin cu e pais ta prepara pa atende loke e ta encera.
Awe Covid-19 rond mundo ta crea problema pa gobiernonan, pa politiconan na paisnan liber, cu a transforma e concepto democratico y deshaci di e realidad cu Pueblo tin un responsabilidad propio den e sistema democratico.
Politica ta wordo forsa pa drenta un epoca nobo di madurez den cual e forma cu ta gasta placa di belasting, cu tambe ta wordo cobra segun regla socialista, ta bira husticia real.
E fondonan cu politiconan tabata tin den nan man awe mester wordo uza pa recupera un pais y pa crea un mundo nobo, cu pa e por tin exito mester ta basa riba realidad.
E ciudadano mester comprende cu e mester cuida su salud. E ciudadano mester comprende cu e ta e prome responsabel pa e dak riba su cabez.
E ciudadano mester comprende cu e mester atende cu su entrada na un forma responsabel den cual no ta e trahe di carnaval ta central, pero manera Arubianismo ta exigi, su base di bida ta central.
Aruba y mundo ta drenta un epoca nobo. E no ta nada facil.
E deber di politica ta awor pa crea e base pa un comunidad por funciona a base di democracia cu ta pa uno y tur. Democracia cu ta acepta cu tur hende ta dicidi kico nan ta haci cu nan bida.
E hoben cu kier paranda for di momento cu tin barba, no por exigi pa e tin loke e hoben cu a sacrifica su bida pa a base di estudio of ofishi, e por gosa di crecemento personal.
E trahador, cu ta uza su entrada pa e tin un vivienda cu ta brinda proteccion na su famia, mester haya recompensa y no castigo pasobra e tin un cas como propiedad.
E empresaria cu ta inverti den progreso y ta honesto cu su pais, no por bira victima di loke ta kibra ley.
Pa Aruba recupera e mester ta un Estado di Derecho, un pais caminda ley ta dicidi na un forma husto y den cual e sistema politico no ta dirigi riba haya voto na eleccion, pero na loke ta na interes di e ciudadano,
Democracia ta nifica, cu ni Gobierno ni Parlamento ni ciudadano por causa problema pa su pais, cu abuso di ley of medionan financiero di un comunidad!
