Comentario: Pa Mercedes Monge
Dia pa dia mi ta ripara, como peaton, cu e cordialidad den trafico na Aruba a perde hopi! Mi ta mira esaki constantemente, y mi mes ta experencie, ora cu mi tin cu cruza caminda. Generalmente den siman, mi ta baha for di Arubus den e bushalte pariba di Well-Well, specialmente entre 5 pa 6 or di atardi, y mi tin cu warda tin biaha hasta 20 minuut, prome cu mi por cruza na otro banda di caminda.
Esaki ta sosode cu hende grandi manera ami, pero tambe cu hende muher na estado of cu un hende cu tin cu pasa hunto cu un mucha man teni: simplemente, no tin un chofer cu ta stop laga e peaton pasa.
Algo cu por mira riba tur caminda grandi na Aruba, na unda no tin ni polis drumi riba e caya, no tin zebrapad, no tin luz di trafico den cruzada, ni nada, absolutamente nada, pa facilita e peaton cruza na otro banda di e caminda.
Y pa colmo, chauffeurnan ta core masha duro mes. Ta conoci cu den e area di Well-Well por ehemplo algun persona a fayece bao wiel di un auto, ora nan a purba cruza caya. Mi mes a yega di puntra DOW si nan por haci algo al respecto, pero nan a bisa cu ta dificil riba camindanan unda hopi auto ta circula, henter dia.
Y no ta menos ora un hende kier cruza riba un zebrapad. Mayoria di chauffeurnan no ta respetando esaki tampoco. Nan ta mira un hende yegando cerca di e zebrapad, cu intencion di cruza caminda y nan ta sigui core manera e señal di trafico no tey. Respeta e derecho di un hende pa cruza caminda riba un zebrapad mester ta un asunto di consenshi, pasobra si nan ta dal un hende tin ley cu e chauffeur tin cu responde na dje.
Pero mas tanto ta cuestion di respet pa e ser humano cu ta na pia, e peaton, ta cuestion di cordialidad cu antes si tabata tin na Aruba. Awendia tin tanto chauffeur cu ta stuur alavez cu ta atende nan celular, cu nan a perde gevoel hasta pa e peligro cu nan por ocasiona, y pa e bida di otro ser humano. Hopi tristo cu tin tanto perdida di balor den nos “one happy island”, pasobra e atencion tey si pa turista, cu por cruza caminda unda cu nan kier y autonan ta para pa nan haya chens, pero no tin esey pa hende local. Ohala tin hende cu por reflexiona riba e situacion aki y wak nan mes si ta identifica cu e comentario aki. Kizas e lo trece algun cambio!
