Dr. Rajnherc, Director di ImSan ta revela:
*Rond di 160 pashent di retina ta wordo opera pa aña na Aruba
* Necesidad di un otro specialista ta urgente
ORANJESTAD (AAN): Director di Instituto Medico San Nicolas (ImSan), Dr. Joel Rajnherc a indica cu nan ta sinta na mesa hunto cu AZV durante basta tempo caba. E falta di profesionalnan pa duna mas servicio na Aruba ta un problema cu no solamente publico ta nota, pero cu na ImSan sigur sa di dje y cu nan ta raporta regularmente bek na AZV.
E medico a splica cu nan tin bon oido eynan, pero e problema cu tin cu wordo soluciona ta significa cu tin cu aumenta e cantidad di trahador cu tin pa duna e servicio. Pero si tin mas hende pa duna e servicio no tur por traha riba e mesun ekipo na e mesun momento pa duna e pashent e servicio.
Esaki kiermen cu ta inversionnan basta grandi cu ta papiando di dje cu mester wordo haci.
Segun Dr. Rajnherc nan ta hopi agradecido pasobra conhuntamente a yega na un acuerdo cu ta bay haci un estudio piloto di 18 luna di amplia e cantidad di personal di servicio di wowo, pero tambe e ekipo cu mester, no solamente pa haci operacion, pero pa haci diagnostico pa e pashentnan.
Un di e problemanan mayor cu ImSan tin aworaki ta cu den e ultimo añanan door di edad di e pashentnan, cu ta subi, tin hopi pashent cu tin problema cu diabetes, presion halto y esey tur ta afecta e bista di e pashent, a remarca.
E cantidad di pashentnan cu tin problema cu nan retina a subi drasticamente. Tambe e conscientisacion. Hende ta nota cu nan tin un problema y nan ta bay mas lihe cerca nan doctor di cas of optometrist. ImSan tin bon relacion cu e docternan di cas. Esaki ta significa cu ora cu un pashent wordo señala cu e por tin un problema den su retina, e ta haya mesora un 'spoed verwijzing' di e doctor di cas y e docter di wowo ta papia cu otro pa wak si ta trata di un caso di urgencia, a señala.
Dr. Joel Rajnherc a splica cu e problema ta cu na Aruba tin un specialista di retina y tabata tin rond di 80 pashent pa aña cu tabata bay afo pa nan retina. Awor caba na Aruba ta yega na un servicio di operacion di retina cu mas di 160 pashent pa aña caba. Esey ta birando di mas pa un doctor por haci, a remarca.
E doctor aki no ta haci solamente operacionnan. E tambe ta haci su consultanan, su tratamentonan di prik den wowo, tratamento di laser, diagnostico di testnan. Esey ta haci cu ora cu un pashent urgente ta yega, henter e programa di e dia ey ta cay den otro ya cu ta casi sigur cu e mesun dia e pashent mester wordo opera, a indica.
Dr. Moreno cu ta e specialista di retina tin cu laga su pashentnan cu ta sinta ainda den e consultorio warda pa e core bay haci operacion, cual ta dura entre 2 pa 4 ora. Esaki ta nifica cu tin cu reschedule e pashentnan y esey ta bira un problema atrobe ya cu su agenda ta yen caba pa e lunanan venidero.
Rajnherc ta di opinion cu mester bin un otro doctor pa yuda Dr. Moreno. Un doctor mas mester bin, un optometrist, administrative medewerker, ekipo, microscop pa e di dos sala di operacion por wordo uza conhuntamente.
A expresa cu n' ta un problema asina facil. Pesey ImSan y AZV a sinta hunto na mesa durante hopi tempo pa analisa y wak si berdaderamente por trece un di dos specialista di retina cu ta bay yuda soluciona e problema aki.
