Nanine Ponson, directora di Fundacion ABO:
- Pueblo mester sa kico tin eyfo pa haci uzo di dje
ORANJESTAD (AAN) Señora Nanine Ponson, Directora di Fundacion ABO (Aruba Bevolkingsonderzoek) a hiba palabra durante e conferencia di prensa organiza pa Fundacion Mira Nos, y el a elabora riba e “Campaña Mira Nos” lidera pa Gilliany Oduber.
Señora Ponson a menciona cu desde November 2012 Fundacion BOB Aruba, y desde October 2024, Fundacion ABO su meta principal ta promove Salud Publico.
“Nos a haci esaki door di facilita sondeonan di populacion pa deteccion trempan di cancer, y asina aumenta e posibilidad y door di deteccion trempan un tratamento efectivo tuma lugar y posiblemente tambe, cura. Desde 2015, e programa di BOB ta activo cu su mammogram preventivo, y desde April di e aña aki, nos a cuminza tambe cu e programa di boca pa boca den matriz cu su pap test preventivo y e programa di Coresa cu su test di af pa deteccion di cancer di tripa”, señora Ponson a splica.
El a expresa cu cada bez cu e ta scucha cu un persona a wordo diagnostica cu cancer, e ta haci algo cu ne, emocionalmente. “Mi ta kere, cu nos tur, mas ainda un persona cu nos conoce y cu no a yega ainda na edad di screening”, el a comenta.
El a agrega cu na momento ora cu el a papia cu Gilliany, na inicio nan no tabata sa con nan ta bay forma e campaña, pero nan tabata sa si, cu e ta grandi. El a bis’e pa papia cu e resto di e cadena di cuido y bin bek cerca dje, cu un plan.
“E meta principal di Mira Nos ta pa promove salud di pecho, pa medio di chekeo propio, y mirando cu cancer di pecho no ta discrimina a base di edad, Fundacion ABO ta opta pa enfoca e campaña aki riba hende muher mas jong cu 45 aña di edad.
Tambe, naturalmente, pa empodera nan p’asina ora ta yega na beurt na BOB, nan por bin haci nan mammogram cerca nos”, señora Nanine Ponson, directora di ABO a señala, agregando cu e meta ta concientizacion. Y, absolutamente, Fundacion ABO no por haci’e su so, pasobra despues di screening y den caso di iregularidad, e trayecto ta continua na HOH of ImSan.
“Den caso cu bo mester di tratamento bo tin e gang di Mary Joan y KVS pa yuda bo cu cualkier necesidad psicocial, sin menciona DVG cu ta monitorea e sondeonan aki na un escala nacional. E cadena di cuido aki no ta posible sin concientizacion. Pueblo mester ta na haltura kico tin eyfo pa nan haci uso di dje”, señora Ponson a indica.
