Medidanan di seguridad na Aruba mester incorpora bienestar turista
- Pasado a entrega prueba di con por asalta Caya Grandi di Aruba
- Alarma di DIARIO pa situacion peligroso confirma den confrontacion
ORANJESTAD (AAN) Kico por spera di Nicolas Maduro? Cuanto peliger di seguridad tin realmente na Aruba, cu mester percura pa bienestar di su ciudadanonan pero tambe mester evita riesgo grandi pa turista, cu ta base di su economia?
Esaki ta base di situacionnan cu, manera publicacionnan ta demostra, DIARIO a presenta na su lectornan ya basta tempo pasa y cu awor ta rementa.
Nicolas Maduro a declara guera abierto na Reino Hulandes y asina na tur teritorio Hulandes cu ta wordo representa segun Statuut dor di servicio diplomatico Hulandes.
Experencia directo den cu e realidad di representacion diplomatico di henter Reino na Venezuela y informacionnan concreto cu ta alcansa DIARIO, tabata motibo cu continuamente DIARIO a atende e amenaza cu Nicolas Maduro ta forma pa Aruba.
Hunto cu informantenan clave DIARIO ta atende e situacion sumamente peligroso cu sigur ta haya motibo di existencia den e realidad cu Aruba a conoce den pasado, ora cu un solo briyante na cielo, teroristanan a apodera di Caya Grandi y Playa na Aruba pa despues di nan acto, scapa di gara di autoridad di Aruba, caminda nan tabata a drenta, hospeda y asalta Caya Grandi sin cu ningun instancia oficial por a stop nan.
E forma cu DIARIO a bati alarma ta completamente den cuadro di informacionnan cu ta duna prueba di e problemanan cu a keda existi for di momento cu Hulanda a opone inicio di dictadura di Nicolas Maduro y problemanan serio a cuminsa den Reino.
Por constata cu ayera e bom a rementa ora Nicolas Maduro a indica cu e ta castiga Reino Hulandes pa medio di medidanan contra representacion oficial di Reino na Venezuela.
Reino Hulandes mester reduci su cantidad di representantenan di Emhada Hulandes segun exigencia di Nicolas Maduro cu ta acusa Reino Hulandes mescos cu Francia di ta mete den su asuntonan.
Manera DIARIO a mustra, Nicolas Maduro a tuma poder gubernamental di Venezuela den su man y a huramenta aunke e resultadonan di eleccion no tabata basa riba normanan democratico cu mundo liber ta exigi.
Sancionnan contra representantenan di Gobierno Hulandes na Venezuela a wordo tuma y entre otro nan libertad di movecion a wordo limita.
Hulanda, mescos cu otro paisnan Europeo y Merca, ta atendiendo cu e situacion nobo cu a surgi y cu pa Aruba ta nifica cu un bom diplomatico ta rementa dilanti su porta di cas y asina directamente ta exigi medidanan nobo di seguridad nacional.
Informantenan di DIARIO ta expresa tambe e temor cu e situacion directamente por crea pa turista, cu ta evita lugarnan cu ta den noticia pa desaroyonan fastioso.
Por bisa cu ya e situacion tin resultado directo pa Aruba y Arubianonan cu ta cay bou e limitacionnan di Nicolas Maduro pa henter Reino Hulandes!
