ORANJESTAD (AAN): Riba Diaranson, e conocido Notario Yarzagaray a presenta na oficina di Lotto na Playa, pa reclama e premio miyonario pa un cliente.
El a presenta cu e ticket di Mega Plus cu a gana e sorteo di Diabierna siman pasa. Esey nifica cu e lo ricibi e premio di 937.500 Florin di Mini Mega, y e premio di 900.000 Florin di Mega Plus.
Funcionarionan di Lotto a revisa e ticket, y ora a scan e barcode, e computer a confirma cu esaki ta esun cu a gana e Mini Mega y Mega Plus.
E ticket ganador aki a wordo cumpra na Tele Uno II, cu ta situa den Caya Betico Croes na Playa.
Normalmente ganadornan di premio gordo, sa busca servicio di un Abogado pa cobra e premio pa nan, den nan intento pa nan identificacion keda un tiki scondi. E biaha aki a nota cu a escoge un otro persona confiable, esta un Notario, cu a bay reclama e premio pa un ganador.
