Na hopi ocasion DIARIO a pidi atencion pa loke no tin popularidad
*Algemene Rekenkamer a expone fayo den responsabilidad Parlamento
*Representacion di Pueblo mester controla empresanan di Gobierno
ORANJESTAD(AAN)—Pa garantisa democracia real na e pais, e sistema legal riba cual pais Aruba ta basa, ta garantisa institucionnan y reglananan ora ta atende cu placa di Pueblo.
Directamente mara na e base di Democracia (Gobierno di Pueblo), tin e exigencia pa Parlamento observa kico ta pasa cu placa di Pueblo, cu ta e base decisivo di loke por haci of no haci pa yega na e mihor condicion di bida di e ciudadano y e mihor base di funcionamento di e pais.
Ley di Contabilidad ta un Ley sagrado pasobra e ta dicidi kico mester haci of no haci cu placa di Pueblo, cu e sistema democratico ta pone bou supervision special di Parlamento.
Pa cumpli cu e deber di Ley di Contabilidad, ta e deber pa Parlamento, vigila cada minuut y sin wega of preferencia politico, loke ta pasa cu placa cu Pueblo ta entrega na gobernacion pa goberna e pais.
Den pasado remoto Gobierno tabata existi di servicionan y departamentonan solamente, cu tabata funciona a base di ley, pero tabata habri caminda pa personanan y companianan gustoso den vista di gobernantenan na mando, ricibi preferencia.
Na mes momento den departamentonan y servicionan fundamental pa comunidad, e maneho cu tabata basa riba areglonan administrativo pa departamentonan di gobierno, tabata forma un estorbo mientras nacionalisacion di empresanan priva tambe a hunga un papel.
E asina yama “Empresanan di Gobierno”a mira luz pa pone exigencianan basico di comunidad den man di Gobierno y pa mehora e calidad y eficiencia di trabou y resultado di produccion pa Pueblo.
Asina Aruba a conoce empresanan, cu por wordo considera independiente pa evita wega politico, pero na mes momento mester atende cu e pakete di responsabilidad cu e pais pa medio di Gobierno tin cu poblacion di e pais.
Na varios occasion DIARIO a bini dilanti cu e forma con pa medio di asina yama “companianan di Gobierno”, e obhetiva pa mihor calidad di servicio na Pueblo y mas eficiencia financiero, no a cumpli cu loke tabata e pensamento basico.
Sigur despues cu Citgo a pasa pa historia, DIARIO a enfatisa ariba e necesidad pa Parlamento di Aruba haya control di e companianan di Gobierno, cu den hopi caso no a honra e motibo di nan nacemento.
Na prome lugar por nota, cu politica a keda vigente den maneho di e companianan, loke a bini dilanti sigur den e exposicionnan cu DIARIO a presenta ora Aruba mester a atende cu e fiasco di Citgo y a wordo presenta cu loke companianan di Gobierno por encera.
Cifranan a cuminsa mira luz tambe di pagonan cu tabata wordo haci den seno di Companianan di Gobierno y asina influencia tambe e costo di e productonan.
Un sistema cu a bay contra e prome regla di democracia, cu ta exigi pa Parlamento di Aruba por discuti y atende tur loke ta wordo cubri cu placa di Pueblo, a base di e Ley di Contabilidad, cu ta mara Gobierno y tur Departamento di Gobierno na e formulanan legal pa atende cu placa di Pueblo.
Di diferente compania di Gobierno, DIARIO a publica entre otro gastonan di personal, pero tambe e realidad clave, cu companianan di Gobierno a bira negoshi priva cu a nace y ta existi cu placa di Pueblo, pa duna servicio na Pueblo y e Pais, y no como formula pa acomoda ningun tipo di politica.
E rapport cu a wordo presenta pa Algemene Rekenkamer Aruba, ta sostene e base legal di uzo di placa di Pueblo den un sistema democratico, cu Algemene Rekenkamer Aruba mester sostene como instancia di consulta pa Parlamento di Aruba, cu sigur mester demostra mas interes pa e su debernan di control di gobernacion financiero, cu haya mas voto pa partidonan den Parlamento.
DIARIO ta sigui sostene e pensamento, cu el a expresa manera ya bisa for di momento cu Aruba a scapa estado di bancarota y berguensa mundial, ora fracaso di Citgo a destrui e base di circo cu a wordo crea pa progreso di Aruba.
Companianan di Gobierno, como compania di Pueblo, mester por wordo controla den Parlamento cu no ta sociedad social, pero e herment di gobernacion di Pueblo di Aruba, cu ta pone su politiconan den e funcionnan mihor paga di e pais, sin puntra con nan ta sirbi e pais a base di nan salario y beneficionan!
For di 2018, DIARIO a hiba un lucha pa Companianan di Gobierno wordo mara na reglanan den cuadro di e Ley di Contabilidad, cu ta e Ley cu mester haci husticia na Pueblo y garantisa cu placa di Pueblo ta garantisa bienestar di Pueblo, di cual Algemene Rekenkamer Aruba ta controlador oficial!
Tribunal di Cuenta di Aruba a papia! Ban spera cu awor Parlamento ta asumi su responsabilidad y ta entrega Aruba un concepto pa asegura democracia real!
