Polis di Paraguay si a keda vigila tur hende di e avion Emtrasur
ASUNCION: E siman aki, Ministro di Interior di Paraguay, Federico Gonzalez a confirma cu oficialnan di Polis di e pais a keda vigila y acompaña e tripulantenan di e avion Boeing 747-300M registra bao bandera Venezolano, ora cu esaki a bishita e pais na luna di Mei pa busca un cargamento di cigaria pa hiba rumbo Aruba.
Manera ta conoci, awor na fin di Juni, e avion Boeing 747-300M aki ta grounded na Argentina, y hayando atencion di prensa internacional.
E Ministro Paraguayo a bisa cu ora cu e avion di carga a yega Paraguay riba Diabierna 13 di Mei 2022, a bin descubri cu abordo tabatin 19 miembro di tripulacion, pues 5 hende di Iran, y 14 hende di Venezuela. Esey ta algo cu a hala atencion di autoridadnan na Paraguay, pasobra un avion di carga normal ta bin cu 6 of 7 tripulante so. Y nan ta bay overnight algun anochi, pasobra e vuelo pa Aruba ta sali te Dialuna.
Pesey Polis di Paraguay a pone extra vigilancia riba e tripulantenan, y extra vigilancia riba e avion staciona na Aeropuerto.
Ministro Gonzalez a bisa cu loke autoridad a haci no tabata un ‘custodia policial’, pero djis un vigilancia pasobra nan no sa exactamente kende a tripulantenan ta.
E avion ta di e aerolinea Emtrasur crea door di Gobierno Venezolano, y pusha bao braza di Conviasa pa e parti operacional. E ta wordo mira como un avion di regimen Maduro. E doño anterior di e Jumbo Jet, esta e Mahan Air di Iran tabata bao vigilancia di autoridadnan Mericano, pasobra e ta wordo considera como colaborador di regimen di Tehran den e respaldo logistico di actividadnan terorista. Y awor cu e avion di Cargo ta bulando bao bandera venezolano, e ta sigui comete iregularidadnan durante vuelo, door di e.o. paga su sistema di ADS-B (paga su visibilidad pa radar).
Ministro a bisa cu Polis na Paraguay a escolta e stranheronan te na e Hotel unda nan a aloha di 13 te cu 16 di Mei na e capital di departamento di Alto Paraná, pero no tabatin ‘custodia’ of un acompañamento permanente durante nan estadia na e ciudad.
Segun e Ministro, na e Aeropuerto Guarani cu ta sirbi Ciudad del Este, na e frontera cu Brasil, ta existi un ‘protocol di acompañamento’ na tripulantenan stranhero, debi cu na e stacion aereo aki ta traslada divisa.
Terorista abordo di e Boeing 747: Mientras tanto e noticia mas impactante ta loke e Ministro encarga cu Servicio di Inteligencia SNI na Paraguay, Esteban Aquino, a confirma Diamars siman pasa cu un di e tripulantenan abordo di e avion Emtrasur, ta un miembro terorista di e Forzanan Quds, cu ta un di e cinco divisionnan di Guardia Revolucionario Islamico di Iran (IRGC) cu ta specializa den combate inconvencional y operacionnan di inteligencia militar. Merca a cataloga e Forzanan Quds como un organizacion di Terorista.
No ta Paraguay so a confirma esaki! Autoridadnan na Argentina caminda e Boeing 747-300M aki ta grounded, a identifica un di e tripulantenan Irani como Gholamreza Gashemi, kende tambe ta un conocido miembro di Forzanan Quds. E ta e piloto di e avion, y ta ademas director ehecutivo y miembro di conseho di Administracion di Qeshm Fars Air, cu ta un compania cu ta duna asistencia na Forzanan Quds.
Paraguay a bisa cu nan ta 100% sigur cu esaki mes ta e persona terorista cu ta viahando rond abordo di e avion Venezolano ta bishitando diferente pais. E tabata abordo di e avion tambe ora cu Dialuna 16 di Mei, el a ateriza na Aruba y a keda par di ora aki. Ningun musca a bula e dia ey pa cu nan presencia.
Otro detaye cu Paraguay a descubri, ta cu ora cu e avion a baha nan a presenta un lista di e tripulantenan abordo. A bin nota cu ningun Irani nan nomber tabata poni riba e lista aki. Posiblemente esey ta e caso tambe ora e avion a baha na Aruba. Autoridadnan di Aruba lo a djis haya e lista cu nomber di Venezolanonan, y ningun hende lo a puntra con bin tin 5 Irani tambe abordo.
Paraguay a bin haya sa kende exactamente tabata e hendenan Irani aki, te ora cu e avion ya a lanta vuelo rumbo pa Aruba. Nan a haya esaki via canalnan di inteligencia internacional. Pero ya e ora e avion a bay caba, cu e terorista di Forzanan Quds abordo como piloto.
Mientras tanto, Aruba a pone e avion di Emtrasur aki riba blacklist.
