Arubianismo mester ta base pa regreso dificil na normalidad
*Producto prohibi pa diabetico central na fiesta di fin di aña
*Inflacion a transforma fruta y berdura den un gasto enorme
ORANJESTAD(AAN)—Na 2019, ora Aruba a duna inicio na celebracion di dianan di fiesta, tabata dificil pensa kico tabata spera mundo.
Temponan dificil tur hende a conoce for di entrada di 2020 y awe Arubianismo mester sigui hiba nos tur na e gratitud necesario di por sali na encuentro di 2023 den un regreso na normalidad.
Pa por drenta e dianan di fiesta di 2022, nos atencion mester ta dirigi tambe riba e realidad cu ainda tempo ta dificil y cu hunto nos mester percura pa tempo bira mas facil.
Pa subi e caminda di fin di 2022 y yega na e entrada di 2023, nos mester por duna otro man pa cada uno di nos asina por sigui cana cu e speransa grandi di e mundo cu nos tur lo mester reconstrui.
Pa cierto gruponan den comunidad e peso di problema durante dianan di fiesta, ta mas grandi cu pa e totalidad di poblacion.
Den e sentido aki nos por pensa riba problemanan financiero pero sigur nos mester dedica atencion na personanan cu pa condicion di nan salud no por participa na tur loke hende kier considera “normal”.
Diferente condicion di salud ta exigi pa mantencion di reglanan y pa e salida di 2022 y entrada di 2023 ta un alegria comun, nos mester tene na consideracion loke ta problema pa otro persona.
E siman aki atencion special ta wordo dedica na personanan cu ta sufri di Diabetis, un condicion medico cu ta wordo hereda den un cantidad di caso pero tambe por presenta su mes na cualkier persona.
Diabetis ta trece cambio den bida di hende, ya cu e ta exigi cambio completo den uno di e factornan tan importante pa hende, cu ta alimentacion y regimen di bida.
Sigur personanan cu menos recurso tin problema pa atende cu e enfermedad aki, cu ta exigi alimento, cu a conoce aumento drastico di prijs durante e 2022, carga cu inflacion.
Un investigacion cu nos a haci ta indica, cu e costo di bida a subi drasticamente pa e diabetico, cu no por cumpra productonan barata sin mas pa e come.
Un diabetico no por enfrenta hamber cu porcionnan grandi di aroz y pan por ehempel. E mester di fruta y berdura cu a conoce aumento importante den prijs y ta motibo cu e costo di bida di un persona diabetico, a subi.
Un problema cu tambe ta bini dilanti ora papia cu personanan cu diabetis ta, e hecho cu hende ta invita nan pa no preocupa cu nan enfermedad.
Na demasiado ocasion ainda ta presenta bolo y articulonan prohiba pa diabetico cu e argumento cu un solo biaha, no ta haci daño.
Con por yuda un persona cu ta sufri di diabetis den e dianan venidero? E prome argumento ta, pa no presenta loke un diabetico no por come, si ta na haltura cu e persona ta sufri di e malesa.
Ora un diabetico nenga un bebida of cuminda, no insisti.
Ora ta organisa un fiesta por ehempel, tene e problema di personanan diabetico na mente.
E pashent diabetico tambe mester tene su mes na regla. No bay un actividad sin come si ta bebe remedi.
Den e temporada tur hende por saborea un hayaca por ehempel. Pero corda cu e hayaca ta manera un plato.
Aruba ta prepara pa dianan di fiesta. Na entrada di e temporada ta presta atencion na uno di e malesanan cu ta causa hopi dolor humano cerca pashentnan, cu hopi bez no ta topa cu e actitud necesario di otro persona, cu den e lucha contra diabetis ta indispensabel.
