Cristiana Nadal, Analista Kimico di WEB Aruba NV:
- E lo tin impacto directo riba salud y seguridad di e consumidornan
ORANJESTAD (AAN) Señora Cristiana Nadal, Analista Kimico na WEB Aruba NV, a hiba palabra den e conferencia di prensa yama pa Departamento di Salud Publico, tocante e estudio tocante nutricion den nos comunidad, yama “Kico Nos Ta Come”.
El a elabora tocante e rol cu WEB Aruba NV tin den e estudio (encuesta). E ta traha den e Laboratorio Kimico di Web Aruba NV, y el a elabora tocante e rol cu WEB ta hunga den e “Total Diet Study”.
“WEB su laboratorio ta realiza analisis kimico y provee datonan exacto, confiable y cientifico esencial pa evaluacion di seguridad di cuminda.
“Nos analistanan kimico lo enfoca riba varios substancia, incluyendo metalnan pisa cu por ta dañino pa salud, specialmente exposicion durante un periodo largo; pesticide cu por aparece durante e cultivo di cuminda di cual algun ta dañino pa salud di hende; aditivo y conservantenan cu hopi biaha ta agrega na cuminda, pa prolonga nan fecha di vencemento, of mehora smak; impureza y contaminantenan cu por surgi durante e procesamento di cuminda. Nos lo haci e ultimo tecnologia y tecnicanan pa identifica y calcula substancianan cu ta den muestranan di cuminda”, señora Nadal a trece dilanti.
El a agrega cu e analisis kimico cu WEB lo haci ta crucial pa seguridad di nos cuminda, y door di midi e concentracion di e substancianan potencial dañino den un rango amplio di cuminda, DVG por haci evaluacionnan di riesgo y duna recomendacionnan, pa minimiza e exposicion na substancianan peligroso.
“Finalmente, nos kier enfatiza cu e contribucion di WEB su laboratorionan na e ‘Total Diet Study’ no ta solamente di importancia cientifico, pero tambe tin un impacto directo riba salud y seguridad di e consumidornan. Nos ta orguyoso di e rol cu WEB tin den e estudio importante aki, y ta ansioso pa sigui contribui na comunidad di Aruba”, e Analista di WEB Aruba NV, señora Cristiana Nadal, a señala.
