Meverly Romano, PR di DIMP:
*A extende e fecha pa entrega te 31 di Juli
ORANJESTAD (AAN) – Meverly Romano, Relacionista Publico di Departamento di Impuesto (DIMP), impuesto riba ganashi, ta un tipo di belasting cu mester cumpli cu ne tur aña.
Romano a indica cu e aña aki tin un particularidad cu e belasting riba ganashi 2023, Departamento di Impuesto no a otorga e formulario di declaracion riba papel, manera ta custumber.
“Desde 16 di Mei, e formulario aki ta den forma digital via nos portal di impuesto. Pues, tur e comerciantenan cu ta cay bao di winstbelasting, mas tanto ta NVnan, VBAnan, stichtingnan, etc., nan tur mester cumpli cu e declaracion den forma digital. Ta necesario pa e empresarionan tin nan boi account pa nan por logging-in den e sistema y asina haci nan declaracion di belasting riba ganashi.
E deadline tabata na prome instante dia prome di Juli, pero DIMP a extende esaki te cu dia 31 di Juli”, Romano a indica.
El a agrega cu aworaki 31 di Juli ta yegando, y ta importante pa empresarionan tene cuenta cu esaki. Normalmente mester entrega e declaracion definitivo di winstbelasting, pero si no ta logra pa esaki, e empresario por entrega e declaracion profesional, haci e pago y e inspector ta evalua si e ta bin na remarca pa un extension di seis luna mas. Asina señora Meverly Romano a informa.
“Den e caso aki, debi cu nos a haci un extension caba, e no ta afecta e seis luna mas, e deadline normalmente te dia 30 di November despues di e extension, pero e ta bira te dia 2 di December debi cu 30 di November ta cay den fin di siman”, Meverly Romano a declara.
El remarca cu aworaki ta importante cu mester entrega e declaracion profesional, of e declaracion definitivo di winstbelasting dia 31 di Juli.
“Ta importante pa tene cuenta cu esaki, pasobra si e fecha pasa e sistema ta genera un cobranza adicional, cual nos ta yama heffingsaanslag, y esaki ta sali cu un boet pa incumplimento. Esaki ta algo cu nos ta pidi tur empresario pa tene cuenta cu e fecha final aki; e ta yegando otro final caba, y ta importante pa e tin su declaracion di aña 2023 entrega”, señora Romano a señala.
