Trabounan di reforma ta sigui den aña 2024
ORANJESTAD (AAN): Manera ta costumber desde aña 2021, cada kwartaal, pais Aruba ta duna un bista di kico ta e pasonan y tambe plannan pa e diferente reformanan cu lo wordo ehecuta den e kwartaal benidero.
Pa cu e compilacion di e agenda di ehecucion di e prome kwartaal di aña 2024, por indica cu e biaha aki tambe esnan encarga cu e aspecto di e contenido di reformanan di parti di Pais Aruba, a traha duro y diligentemente pa asina crea e prome agenda di ehecucion pa aña 2024.
Ta importante pa para keto na e asina yama Mini Conferencia cu a tuma luga dia 8 di december ultimo na unda tur esnan cu tawata encarga cu e trabounan di reforma a bini hunto pa asina hunto reflexiona riba e periodo anterior y tambe tira bista riba e periodo nos dilanti. Ainda tin diferente reforma den plan pa wordo ehecuta como tambe algun cu ya caba ta den ful ehecucion.
E diferente personanan cu ta encarga cu e contenido, por wak bek na un periodo sumamente intensivo pero tambe un periodo sumamente importante pa locual ta crea mas bista di e capacidad y experticio di e aparato gubernamental di Pais Aruba.
Pa e periodo nos dilanti, e aspecto di ownership, y tuma encargo di e reformanan dentro di e contexto local di Aruba, lo ta un tema central pa aña 2024. E experticio pa asina mehora nos aparato gubernamental, servicio publico y como tambe servicio den otro sector, ta algo cu por wordo encontra riba nivel local, cu espacio pa intercambia cu otro partners den Reino.
E prome kwartaal di e agenda di ehecucion di aña 2024, ta para keto na diferente tema y diferente momento di interes. E aspecto di reforsa e aparato gubernamental lo culmina den april 2024 na unda cu lo tin un miho bista di kico ta e tareanan cardinal cu pais Aruba mester eherce pa con pa crea mas eficiencia den e aparato gubernamental sin perde di bista e tarea y responsabilidad constitucional cu pais Aruba ta carga.
Riba e nivel di enseñansa tambe, lo traha duro pa ricibi y crea datonan pa por haya informacion mas concreto y tuma desicionnan den un forma di un asina yama ‘registratie systeem van kengetallen’. Esaki lo haci mas posibel pa tin un miho bista di kico ta e progreso den enseñana y con por maneha y ahusta strategia unda cu ta necesario.
Pa loke ta trata cuido, lo tin tambe algun pasonan grandi cu lo wordo tuma na unda cu lo mehora e conexion entre dunadonan di cuido. Asina e ciudadano ta yega un paso mas cerca di ricibi miho cuido door di miho comunicacion entre diferente nivel di e red di cuido.
Prome Minister Evelyn Wever-Croes ta gradici e ekipo cu a traha duro riba e contenido di e agenda di ehecucion pa aña 2024. Y asina tambe por conclui cu den aña 2024 lo sigui traha riba e reformanan den contexto di Aruba, lo sigui reforsa na unda cu ta necesario pa reforsa pa asina sigui hiba nos pais padilanti.
