Maneho di Reino lo conoce cambio cu entrada di Gobierno nobo
*Constelacion nobo di Parlamento Hulandes y un Gobierno saliente
*DIARIO a enfatisa e necesidad di loke Aruba y Reino ta acorda awe!
ORANJESTAD (AAN) — Kico ta e bon y malo di Gobierno Rutte 4, ta sin duda conoci na Aruba, na Hulanda y na tur otro parti di Reino.
For di 2023, prome cu eleccion, DIARIO a papia di cambionan cu por spera riba tereno politico Hulandes a base di e situacion general na Hulanda pero tambe e situacion mundial cu a trece exigencia enorme pa tur pais na mundo.
Covid-19, salida di petroleo, cambio di clima, e recesion cu a ataca na 2022, sigui pa e gueranan na Ukraine y Medio Oriente, a afecta tur pais na un forma of otro y ta exigi gobernacionnan dirigi riba recuperacion pero tambe riba e tarea gubernamental mas dificil, di mantene un pais riba bon curso despues di gobernacion.
Covid-19 a ataca Aruba, na momento cu e pais a pensa cu e lo por a cuminsa traha riba su recuperacion di e maneho fatal cu Gobierno Mike Eman a laga como herencia na 2017 marca pa un debe nacional pero tambe pago di e proyectonan cu ni sikiera a termina na 2017, pero si a conoce aumento enorme di e gastonan original y sigur e interes cu generacionnan di awe y futuro mester paga.
E pakete cu Gobierno Evelyn Wever-Croes a hereda, manera DIARIO a mustra semper, mester tabata un motibo pa Reino Hulandes, cu mester a interveni, exigi cambio den e maneho financiero di Aruba.
Un cambio cu a bini y cu Pueblo di Aruba a acepta durante eleccion 2021, ora a pesar di e medidanan cu e prome Gobierno Wever-Croes a tuma, Pueblo a habri porta pa Evelyn Wever-Croes keda na mando di pais Aruba.
Sinembargo, historia a entrega prueba con un pais manera Aruba prome cu Covid-19 a bati na porta, pa motibo di un maneho di abuso di placa di Pueblo y señalnan di abuso di placa na bienestar di amigonan politico manera caso Avestruz a presenta den Corte, a haya su mes confronta cu debe y mas debe, sin reserva pa enfrenta un calamidad manera Covid-19.
Esaki ta e base pa temor di Hulanda cu historia por ripiti y francamente e temor di e Pueblo di Aruba, cu pa medio di un eleccion Mike Eman, sigur awor cu Gobierno Wever-Croes ta produci mas placa pa abusa, lo kier bula den gobernacion.
E areglo cu awe Gobierno Wever-Croes a alcansa cu Hulanda, no ta duna Hulanda e poder absoluto cu e supervision exigi pa Hulanda na prome instancia, ta encera.
Aruba ta keda cu su Status Aparte, cu riba su mes, tin e exigencia cu Reino a exigi pasobra manera semper DIARIO a splica, autonomia ta exigi maneho financiero responsabel.
E Ley di Reino cu a wordo acorda, ta consisti di dos parti. E ta solido riba dos base cu ta uno na fabor di autonomia di Aruba y otro na fabor di Reino Hulandes cu Statuut ta obliga di mantene un maneho financiero solido na Aruba.
Den e Ley di Reino ta bini dilanti, kico ta e normanan pa un bon maneho financiero, y Aruba ta regla con e normanan financiero ta, pues con ta percura pa un bon maneho financiero di e pais.
E acuerdo cu Gabinete Wever-Croes a alcansa pa Aruba no ta un triunfo pa Hulanda, pero sigur un sosten pa tanto Arubiano y organisacion Arubano, cu tabata teme cu un libertad absoluto di Aruba pa haci y deshaci riba tereno financiero lo a produci otro caos financiero manera produci pa Gobierno Mike Eman, cu a destrui e forsa financiero di Aruba, cu a wordo crea dor di e pagador di belasting di Aruba.
E acuerdo cu a wordo alcansa pa Gobierno Evelyn Wever-Croes pues ta honra e realidad cu placa di Aruba ta parti di e produccion di inversion, trabou, lucha di comercio y trahadornan Arubano y di Aruba como pais.
E ta bini na e momento oportuno, ya cu e Gobierno cu a negocia cu Aruba y cu ultimamente a wordo representa dor di Secretario di Estado Alexandra van Huffelen, ta despedi y un Gobierno nobo lo sinta.
Un tempo di hopi incertidumbre, manera DIARIO a anuncia na tanto ocasion, ta haya su inicio na momento cu e Gobierno Hulandes nobo sinta. Awor cu e acuerdo aki den man, Aruba tin un base cu ta cumbini Aruba y no por wordo kibra sin mas dor di e Gobierno nobo, cu lo wordo respalda pa e constelacion nobo di Parlamento Hulandes.
Aruba awor por ehecuta e acuerdo, cu ta defende interes di Aruba ya cu Reino tin herment pa actua contra abuso pero tambe ta respeta autonomia di Aruba!
