ORANJESTAD (AAN): Directie Volksgezondheid (DVG) ta invita comunidad pa reflexiona riba e evento natural cu a tuma lugar diaranson,
ora un temblor fuerte di magnitud 7.2 y 7.5 a wordo registra den region di Venezuela. Afortunadamente, Aruba no a sufri daño tampoco efecto di esaki pero e situacion aki ta recorda nos cu calamidadnan por sosode sin aviso.
E pregunta importante pa cada ciudadano ta: bo ta suficientemente informa y prepara pa sa kico pa haci si un calamidad asina afecta Aruba un dia?
Pensando riba e salud, siguridad y bienestar di comunidad, DVG tin un seccion special riba su website cu yama “Calamidad”. Den e seccion aki, comunidad por haya informacion practico, consehonan util y accionnan cu mester wordo tuma prome, durante y despues di diferente tipo di calamidadnan.
Entre e temanan trata tin:
• Temblor di tera
• Tsunami
• Horcan
• Candela den cas
• Enfermedadnan infeccioso
• Preparacion di un emergency kit
• Numbernan di emergencia y otro informacion importante
DVG ta encurasha tur residente pa tuma un momento pa bishita website di DVG y familiarisa nan mes cu e informacion disponibel. Preparacion ta cuminsa cu conocimiento.
Bishita www.dvg.aw y busca e seccion “Calamidad” pa lesa mas.
Calamidad no ta avisa. Informa nos ta miho prepara.
