ORANJESTAD(AAN): One Healthy Day ta un actividad pa promove salud mental y salud fisico, cu ta bay tuma lugar Diadomingo,
unda cu hendenan tur caminda rond di nos isla por participa na diferente actividad fisico saludable.
Durante un conferencia di prensa Diaranzon mainta Dahariana Evertsz di seccion di salud di DVG a trece dilanti cu DVG cu placer ta participa na e evento importante aki.
“Manera boso sa DVG ta pone hopi enfoke riba nutricion di hende y pesey nos ta comparti informacion cu pueblo di Aruba, unda cu ta promove tambe movecion”.
Nos mes ta bay ta presente na Cas di Cultuta cu nos booth-nan informativo, unda cu cada un di nos departamentonan ta bay tin nan flyer specifico cu informacion.
E dia aki ta bay ta tambe Dia Internacional di Salud Oral y nos lo duna pues informacion di esaki tambe, segun Evertsz, kende a indica cu e intencion ta pa full e aña keda activo pa loke ta stimula salud fisico y mental.
“Nos di DVG tambe ta haya importante pa bo no solamente bin y tuma e informacion, sino tambe activa bo mes y participa na e diferente actividadnan, cu ta inclui tambe workshops na Cas di Cultura”, segun e representante di DVG.
