Jurette Croes, PR ta informa:
ORANJESTAD (AAN) – E Relacionista Publico di Departamento di Salud (DVG), Jurette Croes, den un encuentro cu prensa a duna informacion tocante e proyecto Steps 2023.
Jurette Croes a menciona, pa esnan cu no sa ainda, cu Departamento di Salud Publico, conhuntamente cu Organizacion Mundial di Salud (WHO), y Central Bureau Statistic, ta organizando un investigacion nacional 5.120 persona ta bay pasa den un survey, pa por duna mas informacion posible na DVG, tocante nan custumbernan pa loke ta trata salud, y cu tin biaha ta conduci na malesanan no transmisibel.
“ E investigacion aki ta pa DVG haya data, pues informacion di kico précis ta biba den nos comunidad, kico ta nos custumbernan, kico nos ta haci den nos bida diario, cu ta conduciendo cu nos ta mira aumento di casonan di cancer, diabetes, presion halto, y obesidad. Esey ta e meta di Steps”, Jurette Croes a comenta.
Jurette a menciona cu nan tin 20 encuestador, cu ta uniforma. Nan tin un flanel blanco cu nan emblema, nan tin identificacion. Nan ta yega na un cas di famia y ta puntra cuanto hende ta biba eyden, y ki edad nan tin, nan ta hinca esaki den un sistema automatiza cu DVG ta haya for di WHO, y e sistema ta scoge un hende di cierto edad, sea hende homber of hende muher. E ora ey e persona ta bay participa na Steps.
E persona ta haya varios pregunta pa contesta riba su salud, y si e ta huma, of bebe, con frecuente e ta hacie, si e ta practica un deporte, kico e ta haci pa recrea su mes, y hopi importante, nan ta puntra riba su salud mental tambe.
“Despues di contesta e preguntanan aki ta bin e step #2 cu ta midimento di presion, largura, cintura, pa wak si e persona tin sobrepeso of no.
Step #3 ta encera un test di sanger, pa check e glucose y e cholesterol”, Jurette a splica.
Pues e staps ta consisti di tres paso. Paso 1 y Paso 2 ta wordo haci na cas mes, y paso 3 tin cu wordo haci na ayuna (no por come ni bebe prome) y e persona aki ta wordo invita pa bin na DVG, na ex-laboratorio of tambe por bay IBiSA na San Nicolas, parti mainta trempan.
“E motivo di e entrevista aki ta pa informa comunidad di e steps aki, pero tambe pa pidi su cooperacion pa cu esaki”, Jurette Croes a agrega.
El a indica cu si e encuestador pasa y no a haya e persona na cas, e lo laga informacion atras cu nan a pasa, y e ora ey tambe por yama e number di telefon cu tin riba e notificacion, pa por contribui cu Steps 2023”, Jurette Croes, PR di DVG a informa.
