Compra y benta di cuminda ta bira druk den temporada di fin di aña
ORANJESTAD (AAN): Yvette Geerman di Departamento di Higiena y Inspeccion di Alimento a trece dilanti informacion hopi importante pa loke ta e temporada di fin di aña.
El a splica cu fin di aña ora bo a cumpra cos di come ta bon pa corda riba e aspecto di e asina yama carchi berde of carchi di salud y si e lugar unda bo ta cumpra cuminda ta limpi.
Geerman ta haci un suplica na comunidad en general pa 'check' unda bo ta haci bo compras y tambe ta bo derecho pa haya sa si e hendenan cu ta traha eyden tin nan carchi di salud si of no.
Pone atencion na locual ta higiena di e localidad y sea consciente unda bo ta cumpra bo cuminda. Esnan cu ta prepara cuminda mester corda bon cu locual ta manipulacion cu cuminda ta algo hopi sensitivo. Pesey mester haci'e cu tur e reglanan di higiena y cumpli cu tur e rekisitonan cu mester tin, a remarca, pa ningun cliente despues reclama cu el a bira malo.
Pa loke ta cuminda no por haci wega cu ne. Ta algo hopi delicado, a bisa. Si un proceso no bay bon tin hopi risico cu na final e cuminda ta bay keda malo y esun cu ta bay bira malo ta bo mesun cliente.
Yvette Geerman a laga sa cu nan ta na altura cu esaki ta un temporada basta druk. Aruba ta conoci cu ta gusta prepara hopi cuminda y hende ta gusta come hopi. DVG ta consciente di esey y ta purba acapara lo maximo cu ta posibel.
Tur keho cu drenta cerca nan ta atende nan cu hopi seriedad y si cosnan bay robes DVG ta actua tambe, a bisa.
Tin un aumento den e bendemento di cuminda, a agrega. Tin diferente accion ta tuma lugar pa haci control riba locual ta e localidadnan cu ta bende cuminda y nan ta kere den keda duna informacion tambe pa asina e por yega cerca esnan cu ta bende cuminda.
Su mensahe ta "sea critico y consciente pasobra al fin y al cabo ta responsabilidad di esun cu ta bay cumpra y ta responsabilidad di esun cu ta bende (...) Y si tin algo cu no ta bon yama Salubridad Publico y nos lo atende e casonan".
