Franchesca Heinze, director ATHA:
ORANJESTAD (AAN) – Manera ta e caso cu diferente otro organizacion, Asociacion Trabao di Hubentud Aruba (ATHA) mescos CEDE Aruba, ta subsidia organizacionnan miembro cu ta crea camp pa vacacion, unda cu ta duna oportunidad pa hobennan pasa hunto momentonan diferente y agradable, bao supervision.
Asina Franchesca Heinze, director di ATHA a indica den entrevista cu DIARIO.
El a agrega cu e participantenan tin e oportunidad di pasa dushi, explora, pero den balans. Locual ta pasa ta cu e Kampnan ta dura un of dos siman y esey tin su gastonan cune, y esey ta e motibo cu no tur hoben por probecha y tin biaha mayornan no tin otro alternativa di un luga pa laga nan yiu, ni wak kico nan haci.
Franchesca a expresa cu pa e muchanan esey ta fastioso ta na cas, sinti laf, nan kier haci algo anto e ora ey nan ta busca di crea nan actividad pa nan haci.
Heinze a subraya cu loke ta hopi importante ta e seguridad pa e mucha y hoben. Aki, mayor ta cay aden. Mayor ta responsable pa su yiu, si e ta permiti’e haci actividad pafo di un camp, entre amistadnan, sin supervision, kico cu pasa e mayor ta esun responsable.
Su mensahe pa mayornan ta pa nan sea conciente di nan decisionnan. Ta comprendible cu e hoben ta den un etapa unda e ta bay explora y si por ehemplo, e kier bay un cinema bay cune kizas anochi, of bay cerca di unda e hoben ta, of coordina cu un madrina, of otro persona cu ta di confianza, cu por compañ’e y tin un supervision, cu tog ta haci e hoben tin su libertad cu limite, den un estado sano, pero cu e no ta djis pa su cuenta. “Corda cu e hobennan ora nan ta hunto, sin supervision, nan ta liber, ta chat, ta message y topa cu hendenan cu ora e mayor no sa kico ta tumando lugar. “Pero si algo bay fout, bo ta esun responsible. Pues, nos ta pone hopi enfasis riba e responsabilidad di e mayor”, Franchesca Heinze, director di ATHA a señala.
