ORANJESTAD (AAN): E siman aki ta Siman di Lantamento di Mucha y durante un conferencia di prensa, director di Centro pa Hoben y Famia Yvonne Geerman Bermudes a trece dilanti cu
durante e siman aki e Comision Vision Pedagogico kier pone extra atencion na e tarea importante cu henter nos comunidad tin pa loke ta lantamento di mucha.
“E Comision Vision Pedagogico ta un comision cu ta consisti di 5 diferente organizacion, esta Departamento di Asuntonan Social, Tienda di Educacion, Fundacion pa nos Muchanan, Fundacion Respetami y Stichting Wit Gele Kruis”.
E organizacionnan aki hunto cu Fundacion ADRA y FADA ta forma parti di e Centro pa Hoben y Famia, unda cu nos ta ofrece tur nos servicionan bao di un solo dak, segun Bermudes.
El a sigui bisa cu e meta ta pa brinda informacion, guia y sosten na henter e comunidad, riba e tema di lantamento di mucha.
“Pa e motibo ey awe mi kier pidi comunidad atencion pa e 6 puntonan basico”.
Ban lanta nos yiunan cu amor y respet y den un ambiente safe.
Ban duna nos yiunan compliment.
Tin espectivanan realistico pa nos yiunan, ban lanta nos yiunan cu disciplina positivo y cuida nos mes como mayor pa asina nos por cuida nos yiunan.
Mayornan no lubida, nos por busca sosten pasobra tin ayudo, segun e director di Centro di Hoben y Famia.
El a sigui bisa cu ta importante pa concientiza tur hende cu nos tin cu pone nos muchanan central.
“E importancia di e derechonan di nos muchanan, esaki ta e motibo cu nos a combina tambe e siman di lantamento di mucha cu e dia internacional di derechonan di mucha”.
Nos kier pone enfasis riba e papel importante cu mayor y educadornan y henter comunidad tin den e lantamento di muchanan na Aruba, segun Bermudes.
El a sigui bisa cu Centro pa Hoben y Famia ta celebra awe cu 1 aña pasa nos a habri nos portanan oficialmente y nos kier a tuma e oportunidad pa gradici e comunidad completo cu a demostra nos nan sosten, cu a bishita nos actividadnan y cu ta bezig ta ‘follow’ nos Facebook page.
Mi kier a gradici tambe stagiaire y boluntarionan cu a contribui durante henter e aña pa actividadnan cu a tuma lugar na e centro y tambe e demas partnernan di e plataforma Vision Pedagogico cu tambe ta contribui cu e charlanan cu nos ta ofrece, segun director di e centro.
El a gradici tambe Gobierno, cu por medio di Crisis Plan Social a mira y ta kere den e importancia di e proyecto aki y lo sigui sostene esaki.
