ORANJESTAD (AAN) — Sheila van Veen, Director di Stichting Algemeen Pensioensfonds Aruba (APFA), hunto cu señor Sherwin Vingal, director Financiero,
a reuni cu Formador mr. Evelyn Wever-Croes, den cuadro di e reunionnan cu stakeholders externo; esaki, dentro di e proceso di formacion di Gabinete Wever-Croes II.
Señora van Veen a declara den e conferencia di prensa despues di e reunion aki, cu APFA a haya un reunion interesante, unda nan a haya algun pregunta importante. “Nos a duna un presentacion cortico, tocante e fondo di pension y diferente desaroyo den e ultimo añanan tocante e fondo di pension aki, y tambe riba desaroyonan financiero, e posicion financiero di e fondo; a duna un splicacion cortico tocante APFA su inversionnan, y otro temanan importante pa e fondo di pension den futuro.
Van Veen a splica cu loke ta keda un reto semper, pa un fondo di pension, ta rendimento. E mester general basta rendimento, pa e participantenan y e pensionadonan pa nan por duna un bon pension y cu por indexer tambe. A referi tambe na e parti di flexibilidad, pa duna e participantenan mas opcion den nan pension, y kico lo ta e desaroyo den e area ey den futuro.
Durante e encuentro aki APFA a presenta su portfolio di inversion y a splica Formador cu nan tin un parte den exterior y otro parti localmente, y den ambos portfolio tin retonan diferente. Por wak cu e mercadonan den exterior ta hopi voluble, y APFA sa cu e rendimento den futuro podise no ta bay ta mesun halto cu e ultimo diez añanan. Kiermen, den e portfolio ey, nan lo enfoca den maneha downside pa mantene e cobertura mas stabile posible. E reto den e portfolio local, ta ki oportunidad APFA ta bay tin pa inverti e fondonan di pension.
Director di APFA a reitera cu e tabata un reunion hopi interesante y nan a keda hopi gradici cu nan tambe por a duna nan input, e biaha aki.
