Haydelyn Thijsen, Executive Office di BCA:
- Grandi y chikito lo siña hopi tocante BCA
ORANJESTAD (AAN) Señora Haydelyn Thijsen, Executive Office di BCA, tambe a hiba palabra den e conferencia di prensa, convoca Diaranson, tocante nan evento di dia 22 di November venidero. E dama a cuminza bisando cu pa proyecta e trayectoria di ‘rebrand’ y e compromiso di ta mas cerca di comunidad, nan ta organiza ‘Conoce BO Banco Central’, cu enfoke riba nan diferente seccion, y na unda grandi y chikito lo ser conoci cu nan trabao y trayectoria. E evento lo tuma lugar di 10’or di mainta te 6’or di atardi.
“Durante e dia nos lo mustra e diferente seccionnan di nos trabao, den e rol di mantene stabilidad financiero riba nos Isla, conscientizacion riba Cyber Security, y tambe educacion financiero. Publico lo por siña mas di Banco Central den su rol, e balor di nos florin, sigura stabilidad financiero y oportunidad tambe pa cuminza un carera aki, na Banco Central. Nos lo tin cuater seccion den cual nos ta bay ta rico den informacion y tambe ta bay ta sesionnan interactivo y participativo”, señora Thijsen a splica.
Señora Thijsen a agrega cu esaki ta nifica cu e publico ta bay tin acceso na e comunicacion, participacion, y informacion di cada seccion.
El a splica cu tin cuater seccion: E prome ta “Banco Central di Aruba: antes, awe y den futuro”, e di dos: “Nos Tesoro, Aruba su Florin”. E di tres: “Cyber Operations”, y e di cuater: “Bo Finanzas den Bo man”.
“E prome seccion lo refleha Banco Central su tareanan principal, historia, direccion strategico y tambe ‘Con pa traha na Banco Central di Aruba’. Esaki ta sigui pa un exposicion unda cu lo mustra placa di papel, monedanan di pasado, di awo y di futuro, cual ta e di dos seccion Nos Tesoro. Den e di tres seccion, Banco Central ta habri su portanan pa Cyber Operations”, señora Thijsen a relata. Esaki ta un actividad interactivo unda cu lo concientiza comunidad tocante “Cyber Security”.
“Como ultimo seccion, lo tin tayernan financiero pa tanto grandi como chikito, con pa maneha budget, con pa spaar, tambe lo tin weganan di puzzle pa mucha, tocante maneho financiero”, señora Haydelyn Thijsen a bisa, finalmente.
