Minister Rene Herdé
ORANJESTAD (AAN): Minister di Infrastructura, Telecomunicacion y Vivienda, sr. Rene Herdé a splica cu e motibo di su bishita na Hulanda ta pa scucha, siña, observa y busca experiencia encuanto e retonan grandi cu actualmente Aruba ta enfrenta. Algun di e retonan ta cu tin cierto departamentonan cu a wordo neglisha pa basta tempo y awo Ministerio HIT mester acelera nan recapacitacion pa haci e trabou manera mester ta.
Un di e retonan mas grandi actualmente ta esun di vivienda. No obstante cu Hulanda ta hopi mas grandi cu Aruba nan ta enfrenta e mesun problematica encuanto scarcedad di espacio. Hulanda como pais grandi a siña pa adapta y haci miho uzo di e placa disponibel pa maneha servicionan di utilidad y varios aspecto necesario den construccion di vivienda.
Durante e bishita na Hulanda lo tene varios combersacion pa haya mas conocemento riba tereno di vivienda y pa wak con ta e miho manera pa bin cu un solucion pa dicho problema. Antes na Aruba tabata otorga tereno relativamente grandi na tur hende, pero actualmente no tin e disponibilidad mas pa haci esaki.
Mester cuminsa na diferencia e situacion y necesidad di cada persona p.e. un famia di edad hoben compara cu un pareha di edad avansa. Alabes lo mester pensa den construccion di mas edificio vertical y no solamente horizontal. Mundialmente a wordo comproba cu esaki ta mas efectivo den uzo di utilidad y espacio, paso di e forma aki bo por crea mas vivienda.
E meta ta pa purba satisface e necesidad di cada persona di un manera eficiente y pa haci e trayecto di construccion mas cortico pa asina yuda suprimi e gastonan halto mara na contsruccion.
