Directora di Stichting Reclassering Seraida Pemberton:
ORANJESTAD (AAN) –Seraida Pemberton-Leonard, director di Stichting Reclassering, recientemente a biaha pa Hulanda pa e Jubileo di e Departamento cu ta encarga cu intercambio di clientenan ambulante cu ta bao guia di Reclassering, den e diferente paisnan di Reino.
Pemberton a duna di conoce, den entrevista cu DIARIO, cu nan a duna un presentacion na Aruba Huis, no solamente pa e personal sino tambe pa studiantenan pa nan conoce e trabao di Reclassering, pasobra hopi biaha nan no ta inclina pa bay den e rumbo di reclassering; dus, nos a duna informacion y nos a haya basta interesadonan cu lo kier bin bek Aruba, pa traha den e ramo ey”, Seraida Peberton a señala.
Tambe e tabata tin combersacion cu diferente organizacion encuanto “electronics toezicht’ cu nan ta interesa pa trec’e Aruba. “Y nos a haya basta informacion y material tambe pa nos por wak. Un di e proyectonan cu Reclassering kier enfoca riba dje, ta e banchinan. Nos kier cuminza cu un proyecto piloto pa cu nos hobennan, p’asina por monitorea nan movecionnan miho, esey ta un proyecto cu nos ta treciendo e aña aki”, señora Pemberton a indica.
El a splica cu, cu e banchi toch e persona ta keda liber y e ta link cu un programa cu no unicamente e hoben por ta den cas, pero e por sigui bay scol. “Cu e banchi nos por controla unda e ta bay. Si e ta bay un caminda cu no mag di bay, e ta bay haya un señal p’asina nos yam’e di biaha y papa cu ne”, señora Pemberton a señala.
El a bisa cu e banchi, eigenlijk, no ta un strafe, sino un forma positivo di guia e hoben: bo ta baha e daño cu detencion ta haci na nos hobennan, pero di otro banda bo ta siña structura pa e por sa unda e mag di bay, unda e no mag di bay, cuant’or e tin cu ta na cas. “Pues, esaki ta un guia positivo cu bo ta duna e hoben”, Pemberton a reitera.
