Minister Wendrick Cicilia, titular di turismo:
*Tanto operacional como personal, y gobierno ta tumando pasonan necesario
ORANJESTAD (AAN) – Minister di Turismo, Transporte y Labor, mr. Wendrick Cicilia, a señala cu durante e prome dianan di gobernacion AVP-Futuro, nan asumi nan responsabilidad y a realiza un bishita na Departamento Meteorologico di Aruba, cual ta un instituto vital pa e curason di Aruba su economia, cual ta Turismo.
“Nos por a identifica diferente reto operacional, pero tambe personal, cu merece atencion y tin nos atencion. Nos ta, na e momentonan aki, hibando un discusion cual ta e miho manera, strategicamente, pa acerca tur e retonan aki. Un di e retonan latente na e momentonan aki, ta continuidad di e contrato di e actual director di e dienst. Esaki ta den proceso pa bay Conseho di Minister, p’asina por cumpli tambe cu e normanan internacional”, e mandatario a señala.
Na e momentonan aki e contrato di sr. Barkmeyer a caba y sr. Robert Tromp cu a bay haci un estudio paga pa Gobierno, DRH no kier reconoce su diploma.
Minister Cicilia a agrega cu e ubicacion actual Departamento Meteorologico, tambe tin su retonan. “Tin diferente pensamento con pa mehora e aspecto operacional, pero tambe e mehora aspecto di e instrumentonan necesario pa percura pa tin e inversion necesario pa nos tin un Instituto Meteorologico cu ta funciona profesional y optimalmente”, Cicilia a subraya.
El a señala cu ya caba a envia e documentonan rekeri na Conseho di Minister, y tambe tin dos Meteorologo, cu a conduci nan estudio den exterior, y esaki tin algun reto pa wordo reconoci, y e tin gobierno su atencion y a manda pidi conseho na DWJZ, pa cu esaki.
“Pasobra si bo mira e cantidad di personal cu normanan internacional ta exigi y locual cu nos tin na e momentonan aki, na nos departamento, tin un discrepancia grandi y e ta importante pasobra esaki ta expone Aruba tambe na diferente proceso di supervision. Aruba mester, regularmente, audit pa cumplimento riba aspectonan di seguridad di aviacion, y nos tin cu garantiza cu esaki ta wordo regla pa nos sigui cumpli cu e auditorianan aki”, Minister Cicilia a remarca.
E dignatario a señala cu mester ta positivo pa cu esaki, pa por mantene Aruba su acreditacion y mantene nos mes den cumplimento di e normanan internacional y pa esaki, gobierno ta tumando e pasonan necesario.
