Otmar Oduber di Plataforma Nos Pais
*Retonan di e tempo ey a wordo supera y awo mester atende cu retonan nobo
ORANJESTAD (AAN): Na 2011 a tuma luga e cambio den maneho di Aruba su turismo, a crea un ATA Sui Generis y e cambio tabata e conductor di e exito grandisimo cu nos isla a conoce den turismo te di a di awe.
A pasa for di un oficina di turismo cu tabata depende riba e belasting di e pueblo di Aruba, cu cuentanan tabata wordo cera pasobra no tabatin placa pa paga pa promociona Aruba y for di 2011 esaki a cambia totalmente y ta esun cu a logra saca nos cada bes for di e retonan cu por tabatin na caminda. Un ehempel cla di esaki ta Covid: Aruba tabata un di e paisnan cu por a bounce back di biaha pa cu nos turismo pa motibo di e machine bon zeta cu tin na e momentonan aki, ademas di e relacion crea den e ley di ATA SG entre ATA, AAA, AHATA y instancianan riba nos isla.
Otmar Oduber di Plataforma Nos Pais ta bisa cu despues di 13 aña ta momento pa reinventa y prepara pa e retonan nobo, pasobra e retonan di turismo awe ta totalmente diferente na esunnan di 13 aña pasa.
Na 2016 a introduci e ley contra ‘all inclusive’, y Aruba ta e unico pais den e hemisferio aki cu tin e ley aki, escohiendo pa calidad. Di e forma aki a proteha Aruba cu otro hotelnan por a converti nan mes den all inclusive y e unico excepcion ta e hotel na San Nicolas. Esaki a wordo poni den e ley pa por a crea un desaroyo, den un area cu practicamente no tabatin ningun desaroyo tumando lugar.
Na 2018 a introduci un otro ley sumamente importante pa Pais Aruba. A bin cu un voor bereidingsbesluit riba e ley di ROPV, poniendo asina un limitacion riba e cantidad di camber y paro riba permisonan nobo pa hotel. Danki na e decision aki Aruba no lo bay conta cu un hotel di 500 camber manera tabatin prome, al contrario a reduci esaki na menos cu mitad y cu lo carga e nomber di un hotel di calidad manera ta St. Regis.
Ademas unda Iberostar ta wordo construi actualmente tabata conta cu un permiso di riba 700 camber all inclusive. E ley a prohibi e all inclusive y a limita e cantidad di camber na 270.
Otmar ta pone enfasis cu esakinan no ta permisonan nobo sino permisonan cu a wordo duna hopi aña atras, rond di 15 aña pasa. A logra esakinan door di renegocia y baha e cantidad di camber cu tabatin e tempo aya di casi 7 mil te na menos cu 3 mil.
E mesun ley aki di 2018 ta rigi y controla Airbnb na Aruba, es decir, un ley cu ta existi pa casi 6 aña, ainda no ta wordo uza pa controla e aspecto aki.
Tur e cambionan aki a bin, pero awo a yega e momento pa sinta hunto atrobe y prepara pa e retonan nobo.
El a reuni cu ATIA, otro siman e tin un reunion cu AHATA y intencion ta pa sinta cu otro instancia for di e stul di Plataforma Nos Pais logra yega na un maneho nobo pa enfrenta e retonan nobo cu tin den nos turismo.
