Analisis di ponencia di e ala nobo den AVP ta crea reto
*Ala nobo AVP no por sostene Mike y Ley di Contabilidad
*Democracia ta hancra den bon uzo di e placa di Pueblo
ORANJESTAD(AAN)—Aruba y henter mundo a yega na un punto, cu no tin lugar mas pa falsificacion di democracia. Personanan cu kier yama nan mes lidernan autentico di Pueblo, awe mester persigui tur e basenan cu a wordo crea den historia pa sigura e bienestar di henter comunidad riba tur tereno.
Democracia ta hancra den e bon uzo di placa di Pueblo, cu ta entrega parti di su entrada, di su posesion, di loke e tin pa come y biba, na gobernantenan pa asina nan por percura pa e pais.
Bienestar di un persona na un pais democratico ta depende di dos base importante. E persona mes mester produci loke ta necesario pa su felicidad y di esnan pa kende e ta responsabel directamente manera su familia mas cercano.
Pa su pais por funciona, e ta paga hende haci e trabou, loke ta nifica cu Gobierno, Parlamento y e aparato gubernamental ta wordo paga pa percura pa un bon funcionamento di e pais, manera leynan ta prescribi.
Aruba ta un “estado di ley” pasobra no ta capricho di un persona of grupo ta dicidi, pero ley na cual tur hende mester tene nan mes.
Leynan ta dicidi con e placa di Pueblo ta wordo uza, con ta controla con e ta wordo uza y con ta percura pa e wordo uza pa bienestar di uno y tur.
Esaki ta loke ta distingui democracia for di dictadura!
E maneho di Mike Eman tabata basa riba destruccion di e sistema legal pa atende cu placa di e Arubiano y di su pais.
Mike Eman y su Gobierno a abusa di e poder cu a wordo entrega na su persona dor di un Pueblo cu for di momento cu Status Aparte a bira un realidad, el a percura pa haci su persona central.
For di e prome minuut di Status Aparte, Mike Eman a wordo paga dor di e Pueblo di Aruba como consehero di su ruman cu a bira Ministro Presidente y Mike Eman a percura pa crea un imagen pa su partido pa medio di e gobernacion pa cual Pueblo tabata paga.
Si AVP tabata tin un sirbidor, e yama Mike Eman cu a bira sombra di gobernacion como coordinador, cu realmente tabata un trabou como relacionista publico pa su partido, den cual su futuro tabata sigura manera a keda demostra ora un lider nobo mester a wordo eligi y Tico Croes mester a sigui e rumbo pa porta di salida, mescos cu a pasa cu Betico Croes.
Si e ala nobo den AVP kier contribui na un Aruba democratico, e no por aproba e maneho di Mike Eman, cu a destrui entrada financiero di Aruba pa e por a haya voto pa asumi poder di e pais.
Pa e ala nobo den AVP haya credibilidad, e no mester mira Festival di Musica y hunga cu e Ley di Contabilidad cu ta sagrado pa democracia por funciona den bienestar di tur miembro di comunidad y no family and friends, manera scandalnan ta crea e impresion.
Democracia ta hancra den e bon uzo di placa di Pueblo na bienestar di Pueblo, loke ta e base di Ley di Contabilidad y e motibo di existencia di Algemene Rekenkamer Aruba, cu ta tribunal imparcial y sin influencia politico den maneho di placa di Aruba.
Pa democracia funciona, Algemene Rekenkamer Aruba mester haya voz y un rapport manera e rapport di “Bo Aruba” no por bira uno mas.
Algemene Rekenkamer Aruba mester por conduci cu autoridad riba e forma cu ta gasta placa di Pueblo. Pa por tin autoridad, mester tin sancion!
Aki tin trabou pa alanan nobo di tur partido politico, cu mester habri caminda pa un futuro nobo den cual mal experencianan politico ta wordo elimina.
Hamas un ala nobo den un partido na cualkier parti di mundo, por tuma e maneho di Mike Eman como ehempel democratico pero mester considera, a base di e Ley di Contabilidad, e maneho di Mike Eman como destruccion di e bienestar di Aruba.
Pa mundo conoce un futuro nobo, erornan cu a causa problema serio na democracia den realidad mester desaparece, pa bienestar di uno y tur, bira realidad.
