Presidente di SADA ta alerta:
ORANJESTAD (AAN): Presidente di Sindicato di Aduana (SADA), Edward Maduro, a splica cu manera tur hende sa, BBO na frontera lo ta vigente entrante 1 di Augustus. SADA ta haya comunicacion cu nan miembronan y te cu awo, e duaneronan cu mester bay atende cu e asunto aki n a haya ningun tipo di training of sesion di informacion pa locual ta trata BBO na frontera.
A indica cu nan a haya un email unda ta indica cu e ley a pasa y cu ta bay ta vigente for di 1 di Augustus. Pa locual ta trata e cobramento mes no tin mucho informacion riba dje pasobra esey ta sosode automaticamente den e sistema di Asycuda, cu ta e sistema automatisa cu ta traha cu e declaracionnan di Aduana.
Segun Maduro, pero pa loke ta e trata e ambtenaar para na frontera sigur ta bay tin preguntanan tecnico y si no tin e personal bon prepara na pia di trabao pa por duna splicacion. Nan sa cu Aduana ta e departamento menos gusta na aeropuerto. Ora di para un pasahero pa haci nan trabao conforme ley pa cobra loke mester hopi biaha tin friccion of discusion.
Aworaki mirando cu e cobransa ta bay subi, hendenan ta bay haci pregunta y si no tin e personal bon prepara pa por atende cu e preguntanan aki, e por bira un discusion innecesario, a remarca.
Pesey SADA ta lamenta cu no a bin cu un sesion di informacion na pia di trabao pa e duaneronan cu ta atende cu clientenan. Nan lo por haya nan mes confronta cu preguntanan y kisas preguntanan tecnico cu kisas nan no tin conocimento, Edward Maduro a expresa.
