Richella Dorothal, Director DTI:
*Tin procesonan andando pa seguridad mes
ORANJESTAD (AAN) – Richella Dorothal, Director di DTI, den entrevista cu DIARIO a indica cu nan ta traha conhuntamente cu DIMP, pa loke ta trata cantidad di auto registra na Aruba, pero tambe ta traha cu KPA y DTP.
DIMP ta indica na DTI cuanto auto lo tin den e aña y a base di esaki DTI ta calcula cuanto auto, ta suppose, di bin cerca dje.
“Mi ta bisa ‘suppose’ pasobra tin biaha ta pasa cu e autonan no ta bin na DTI pa haci e keuring, y esey ta trece cu ne cu nos no tin tur e datonan como tal, cu manera ta indica si tur a keda sin keur of no a bin, y gran parti ta autonan nobo”, Dorothal a señala.
DTI tambe ta den contacto cu KPA, ya cu, tambe, e ta forma parti di e comision pasobra nan ta trahando conhuntamente cu e otro parti cu ta autonan UTV y E-TV tambe. “Den esaki nos tambe tabata parti di decisionnan cu a tuma lugar, y nos di DTI a traha riba e aspecto di e Landsbesluit concerni cu cambio di ley y nos ta encaminando e proceso aki, cu ta haci cu tin cierto cambionan di exigencianan, cu mester cumpli cu ne pa seguridad di e vehiculo”, Dorothal a splica.
E dama a indica cu pa locual ta trata e vehiculonan di transporte publico, DTI ta trahando hunto cu DTP y nan ta dune e informacion cu nan tin den nan datonan di vehiculonan cu no tin historia vigente.
DTP tambe ta haciendo su controlnan, Dorothal a menciona. “Nos ta ricibi hopi aworaki, mas pa motibo cu e vehiculonan cu nan ta trece pa keuring, si nan no tin e ‘keurings bewijs na DTP e vergunning no ta wordo otorga of no ta wordo sigui encamina.
Esakinan semper ta documentonan rekeri, y manera nos ta bisa, no ta solamente e documento ta importante, pero e importancia di e seguridad”, Richella Dorothal a menciona. El a agrega cu e chauffeur cu ta core auto di transporte publico, tur dia varios biaha bo ta core e vehiculo, mas bez cu un auto particular, y esey ta haci necesario pa por controla esaki.
“Esey, cada aña ta haci e keuring pero tambe por constata si e break no ta bon, si tin cierto areanan cu no ta cumpliendo cu e rekisitonan, pero bo por drecha esakinan. Esaki ta net un oportunidad pa bo controla bo auto. Pasobra hopi biaha particular tambe no ta controla si tin luz, wiper, etc., anto despues ora bo wordo para door di polis, ta wak esaki, y bo ta haya un boet, innecesariamente”, Richella Dorothal, director di DTI, a subraya.
