Haime Vingal, Inspector di DTI:
ORANJESTAD (AAN) – Señor Haime Vingal, Inspector di DTI a splica den entrevista cu DIARIO, con e procedure di keuring y control di gruanan ta, pa e companianan cu ta haci uso di esakinan.
Na prome lugar nan ta haci e control y Inspeccion y despues e companianan ta haya un rapport cu tur e puntonan cu nan mester drecha, y nan ta haya cierto periodo pa drecha nan.
Vingal a señala cu enberdad Aruba no tin tur cos, y mester importa, por ehemplo pieza. Si nan no ta cumpli, of si nan no ta contact DTI pa informe cu e pieza no a yega ainda, DTI ta bay para e grua te ora e wordo drecha.
Vingal a señala cu espacio ta esencial pero e haltura no, pasobra e mester tin e capacidad di yega. Un grua chikito si kier hibe te halto e no ta bay, segun Inspector Vingal.
Encuanto biento, no tin un ley specifico pa esaki, pero si trahado mester bay hopi halto, si tin un regla cu ta bisa cu si e biento ta mas cu 18 meter pa seconde, no mag di use. Pa peso no tin restriccion, pasobra nan por mara un cabuya basta largo na e peso cu nan por hisa e grua y un hende mester guie, pero tur e responsabilidad ta cay e ora ey riba e operator. Si e ta sinti cu por maneha e peso, e por bay, pero si e ta sinti cu no por haci’e, e por bisa cu no ta haci’e. Vingal a splica cu den pasado cosnan a yega di pasa unda e operator ta yama DTI y informe cu tin problema cu biento y cu e no kier haci’e pero e doño ta obligue. E ora ey, DTI ta bin para tras di e operator, pasobra ta traha di seguridad no solamente di dje pero tur e otronan cu tambe ta traha cu e grua.
