Directora, Richella Dorothal:
ORANJESTAD (AAN): Dienst Technische Inspecties (DTI) ta keda boga pa tur compania percura pa nan vehiculonan of nan fleta tin tur papel di keuring na ordo. Asina Richella Dorothal, Directora di DTI a indica.
El a bisa cu DTI ta para tambe pa e seguridad di e trahadornan y si no ta haci e keuring necesario ta cay den un situacion pa loke ta seguro, ora cu tin accidente. Tambe ta importante pa keur y no ta djis pa tin un documento, pero ta pa sigura cu e vehiculo ta den bon condicion ta cora ariba e cayanan na Aruba.
Dorothal a duna di conoce cu relaciona cu e temporada aki di carnaval, esnan cu tin cu bay DTI pa keur nan auto, mester acudi na balie y indica cu ta trata di vehiculonan di motor cu ta bay ta participando den paradanan.
Di e forma ey, por haya chens mas lihe pa por haya un afspraak of riba e mesun dia ta pone un afspraak special, a bisa.
E directora di DTI a indica tambe cu nan ta flexibel pa vehiculonan cu ta bay den parada pa nan por bay haci nan keuring. Tin cu presenta cu e documentonan. Por ehempel, mester presenta e documento di registracion na Departamento di Impuesto, papel di seguro valido. Un keuringbewijs no lo wordo otorga si no tin un seguro valido ya cu esey ta para den ley.
Si ta bira necesario DTI lo habri riba diasabranan pa keur. Ainda DTI no tin un sistema online pa haci citanan, pero ta spera cu pa 2024-2025 por haya e inversionnan y training necesario pa yega na e sistema digital. Ta trahando riba esey, a indica.
