Durante luna di Mei 2024
ORANJESTAD (AAN): Tabata dia 28 di April 2024 cu a observa Dia Internacional riba Seguridad y Salud pa trahadornan. Y e ta un tema cu na Aruba, e departamento di Dienst Technische Inspecties (DTI) tambe ta observa.
Director di DTI, Richella Dorothal a indica cu esaki ta un dia pa trece conscientisacion y educa personanan riba e importancia di traha na un forma safe, y haci trabao den forma saludabel y cu ta adecua pa e trahador.
E ta enfoca tambe pa preveni, pa evita cu tin accidentnan laboral. Cu e parti aki di e tema, pa 2024 e enfoke a bay riba “Insurance, Safety and Health at work in a changing climate”. Cu atencion pa e tema aki, e aña aki DTI ta bay traha a base di un campaña di concientisacion y tambe ta bay cu un accion riba e tema.
Por sinti cu e clima mundial ta cambiando, y e tin su efectonan riba e trabaonan cu ta wordo haci. Den bista di DTI, na Aruba tin solo cu ta hunga un rol grandi, y den dia ta bira fuerte y calor. Aki ta sugeri e doñonan di trabao pa tene cuenta cu diferente aspecto cu por wordo implementa pa asina yuda baha e riesgo di nan salud door di traha den cierto condicionnan. Aki e Directora di DTI a menciona por ehemplo, percura pa tin suficiente awa disponibel pa e trahadornan pa nan ta bon hidrata. Tambe si acaso tin trabao externo cu lo por wordo haci bao di un tent of gazebo, percura pa a lo menos tin proteccion pa e trahador.
Dorothal a indica cu e ultimo ey, no ta den exigencia di ley, pero si dependiendo di e proyecto, e sugerencianan aki ta ser spera di lo tene cuenta cu nan pa evita cu bo tin problema di salud cerca e trahadornan.
Aspecto di Conscientisacion: Richella Dorothal a bisa cu e aspecto di conscientisacion cu nan lo enfoca riba dje durante 2024, ta e.o. suministra informacion cada siman con pa preveni accidentnan laboral y loke ta e proceso. Tambe tin e parti kico por wordo haci pa mehora e situacion di cada trahador.
Tambe lo tin un accion pa bishita diferente establecimento y localidadnan unda tin trabaonan ta wordo haci, incluyendo Malls, Restaurant, Oficinanan, etc., pa asina haci e controlnan necesario, y esaki ta encera inspeccion di seguridad, y exigencianan minimo. Aki ta subraya cu mester tin un baño disponibel pa bo trahadornan, mester tin awa disponibel, y mas aspecto. Na Restaurantnan lo bay check si keuring di instalacion di gas ta vigente ainda, y duna nan nota pa atende esaki. Controladornan di instalacion di gas, cualnan ta reconoci pa DTI, so mag di haci e trabao ey.
Si DTI ripara cu a haci cambio den instalacion di coriente, esey tambe lo bay atende cu e negoshinan riba e aspecto ey.
Dorothal a indica, cu den luna di Mei 2024 mes e accionnan aki lo tuma lugar.
