Directie Natuur en Milieu:
ORANJESTAD (AAN): Directie Natuur en Milieu ta indica cu e turtuga di lama di mas grandi, cu ta biaha bay mas leu, ta sambuya mas profundo y ta bishita Aruba pa pone su webonan ta e Driekiel (Dermochelys coriaca).
E driekiel di mas grandi registra a midi casi 3 meter. Un driekiel adulto por pisa 500 kilo. E turtuga di lama aki ta e unico cu no tin casca duro pero e tin un capa di vet diki di 5 centimeter cu ta sinti manera rubber. E capa riba su lomba corcobia ta color preto of shinishi scur cu 7 liña y tin manchanan color blanco. E ta e unico turtuga di lama cu no tin gara of huña na su flepnan.
E driekiel embra ta uza su flepnan pa coba un buraco hundo riba beach pa pone ongeveer 100 webo, pa despues tap’e bek cu santo blanco. E webonan tin forma di un bala di ping-pong y ta lombra color blanco.
Despues 2 luna e ‘hatchlings’ ta sali bin ariba for di bou tera. Driekiel ta prefera pone su neishi hundo den tera na unda e temperatura no ta varia. Si e temperatura subi riba 29.5 grado Celcius e neishi ta produci mayoria yiunan embra y si e temperatura baha nan ta mas tanto macho.
Mayoria driekiel ta pone, durante su bishita pa pone webo, un averahe di seis neishi. Driekiel ta prefera un beach cu tin un subida halto cerca di lama hundo. Bo no ta hay’e den areanan cu tin rif of baranca, paso e por corta su curpa facil y sangra. Un ehempel unda nan ta pone neishi ta Eagle Beach of Arashi. Ora cu bo wak baricada di DOW riba beach ta indicacion cu ey tin neishi di turtuga di lama. Driekiel ta come kwal (jellyfish) y e ta come hasta esun venenoso e kwal pechi Portugues. Facilmente e bestia ta confundi un saco di plastic cu su cuminda, esaki ta forma peliger p’e sorto aki.
Otro problema ta cu e turtuganan di lama ta keda pega den redanan di pisca y nan ta sofoca y muri.
Algun bon practica pa yuda e bestianan aki ta, ora cu bo bay lama no coba y laga buraconan riba beach, no traha kasteelnan y keda sin basha esakinan bek abou, no benta sushi den cercania di lama y uza menos articulonan di plastic desechabel.
Uno cu ta importante pa tene cuenta cu ne ta uzo di luz den direccion di beachnan. Esaki ta confundi e bestia y ta cambia e direccion den cual nan mester bay.
Danki na Turtugaruba Foundation pa nan trabou incansabel pa yuda e turtuganan di lama cu ta yega nos costa y subi tera pa pone neishi.
