Directora Omaira Lares:
ORANJESTAD (AAN) Den entrevista cu DIARIO, señora Omaira Lares, Directora di Departamento di Recurso Humano di Gobierno (DRH), a indica cu bao encargo di DIA, den cooperacion cu DRH, a traha durante dos aña caba, pa bin cu un “Gedragscode” pa loke ta trata integridad den e Aparato Publico.
“Pues, e siman aki a duna training na DRH su personal, pasobra nos tin cu atende cu hopi di e preguntanan cu ta bin di e departamentonan, e directornan, y e trahadornan pa sa kico pa haci ora algo pasa. Berdad nos ta dunando e training aki tambe na e hefenan di dienst y otro siman tambe tin pa hefenan di dienst, y e idea ta pa nan tur bin y DRH tambe”, Lares a splica cu e meta ta pa trece conciencia kico por y kico no por, den e aparato publico, pa loke ta trata e ambtenaarnan.
El a splica cu tin departamentonan cu no tin regla riba nan, y p’esey a wordo traha un code cu yama “Sa bo caminda” pa tur hende sa kico e ta. “El a wordo traha riba seis tema, y asina nan tin un workshop di cuater ora cu ta pasa riba cada tema poco, poco. No ta solamente pa yega laat trabao, bisti uniform, pero ta trata tambe e relacion afectivo den e departamento, over di finanzas, pues e ta hopi amplio y aworaki nos a cuminza cu ne”, señora Omaira Lares, director di DRH a informa.
