Keda cu e bon energia aki den mente
- Sigui sostene bo famia y amigonan den tur aspecto
ORANJESTAD (AAN): Esaki ta e ultimo fin di siman di aña 2023, y ta un fecha simbolico cu ta invita comunidad na reflexiona riba loke e aña tras di lomba a nifica pa nos, y con nos ta proyecta e aña entrante.
Tur hende por bisa, cu 2023 tabatin momentonan bon y malo, pero independientemente si e tabata un aña pa recorda of no, tin personanan cu tabata t’ey incondicionalmente pa nan amigo y coleganan, y famia, pa brinda e cariño sincero un aña mas.
Maske cu amor pa otro persona ta algo cu lo bo tin di demostra durante henter aña, e fecha aki ta un oportunidad special pa nos demostra esnan importante loke nos ta pensa di nan y con esencial nan ta den nos bida.
“Aña nobo, bida nobo” ta e frase cu popularmente por scucha den e dianan aki, y pa logra cu e aña nobo aki trece cambionan positivo pa bida na Aruba, tin di cuminsa na cambia e forma cu nos ta percibi loke ta rondona nos.
Ban ta mas positivo y perseverante pa logra e metanan cu nos a pone pa 2019. E experiencianan cu nos a biba e aña aki tabata unico y lo keda semper como un recuerdo pa yuda nos siña di nan.
Por mira cu Aruba tambe a biba un aña yena cu reto y obstaculo. Tabatin cambio riba cierto tarifa, a bin cu BBO na Frontera. Tin cierto productonan cu enberdad prijs a baha basta den Supermarket. Pero ata den ultimo luna di aña, diripiente prijs di webo importa a bolbe subi. Esaki tin di haber cu plamamento di Griep di Parha na Merca, cu a pone hopi criadero di galiña bay perdi, pues webo a bira scars.
Keto bay e isla ta confronta tin biaha cu e disponibilidad di cierto producto pa yega Aruba na tempo. Por ehemplo tin tardansa enorme pa haya unidadnan grandi di airco cu ta instala na edificionan grandi. Tardansa pa haya material specifico pa construccion. Pues bo tin di bestel nan cu hopi tempo adelanta.
Aunke recien a indica cu e depresion cu ta wordo sinti relaciona cu inflacion halto, lo por sigui aun den 2024. Tambe e hecho cu e famoso tienda di Mango den Caya Betico Croes lo bay cera su porta. Toch comunidad por keda cu positivismo cu aña 2024 lo ta uno, caminda por mira progreso realistico pa comunidad.
Ya caba AZV a indica cu lo bay tin Praktijk Ondersteuners cu lo por yuda varios Consultorio di Docter cu asistencia den caso di personanan cu ta pashent mental. Esey ta un formidable bon noticia pa 2024. Y e plan ta pa sigui amplia esey, como cu Aruba tin mester di dje drasticamente como cu e lista di espera pa haya consulta na Respaldo ta gigantesco.
Por spera cu 2024 lo por ta aña di transformacion positivo pa nos isla, den cual nos lo sigui construi e caminda di e futuro mihor cu tanto tur hende ta desea pa Aruba. Cu aña 2024 permiti abo y bo sernan keri logra yega na haya e mihor cu bida tin pa ofrece, balorando semper esnan cu stimabo mas, pasobra sin nan presencia den bo bida... nada lo ta mescos.
