ORANJESTAD (AAN): Eleccion ta na caminda pa Diabierna 6 di December 2024.
Esey a pone cu Departamento di DOW a cuminsa cu e trabou nan di preparacion pa esaki.
DOW su tarea principal den eleccion ta pa percura pa tur urna electoral ta den bon estado, si mester un drecha luz, verf of pone un rampa pa e persona nan invalido pa asina tur urna ta accesibel pa tur hende.
Tambe DOW ta encarga pa haci trabaonan di inrichting di tur urna electoral, esaki ta encera arma e hokinan di voto, pone e barinan di voto, pone lessenaar y stoel pa e comision di cada urna, pone heki paden di e urnanan pa guia e personanan bay na e president di urna electoral.
Fuera di esey, nan ta encarga pa pone barricadanan pafo pa guia tur e personanan y na final pone borchi di indicacion unda e urna ta situa. Pa cu esaki DOW tin su coordinador y teamleiders cu a cuminsa cu e trabao nan preparatorio mane cu e draaiboek ta stipula.
