Ing. Marlon Croes, director DOW, ta splica:
ORANJESTAD (AAN) — Director di Departamento di Obranan Publico, Ing. Marlon Croes, a menciona dos reto cu DOW a pasa aden, pa loke ta Bubali Plas RWZI. Un di nan, considera un calamidad, tabata e 'aeration tank', cu su beton rond di dje, cu tin 50 aña bieu, cu tabata den un estado deplorabel, y cu e lo a cay kibra e ora ey si nos tabata tin un problema serio na Aruba.
“Como tal, nos a tuma un cierto decision y cierto riesgonan y nos a logra di haya un contratista cu a haci e trabao, cual falta 1% pa keda cla. Pero e riesgonan cu e muraya aki cay riba otro y lo a bira un calamidad, no tey mas. E riesgo ta nulo aworaki”, asina Ing. Marlon Croes a bisa.
E otro reto, Croes a reitera, ta con lo haya e financiamento pa drecha e capacidad di awa di Bubali Plas y tambe pa e parti bacteriologico y nutriente.
Marlon Croes a señala cu actualmente ta dos biaha e capacidad di e planta. E por handle 4.300 y ta ricibiendo mas di 8 mil m3 di awa pa dia.
“Kiermen, si nos wak’e bon, nos a surpass e capacidad caba. Loke a wordo haci ta cu nos a busca tres aerator nobo, entre otro, y e siman aki nos tin cu haya e prome materialnan kimico, pa nos por cuminza combati e mal holo. Esaki ta ora cu cinco awacero a cay, y mester menciona cu den e proceso Utilities tin e idea di busca un planta movil, pa yuda e proceso, pero nos cu Utilities tin cu bay discuti esey”, Marlon Croes a indica.
Director di DOW a subraya cu un bez cu e traspaso di e planta di purificacion wordo traspasa pa Utilities Aruba NV, tur e plantanan RWZI, Parkietenbos, y esun di zeewijk, ademas di e rioolnan cu por wak riba caya y e incinerator, ta bay cune.
Finalmente, Ing. Croes a bisa cu e prome siete añanan lo no tin pago pa e servicio di e planta.
