ORANJESTAD (AAN): Diamars mainta Premier Evelyn Wever - Croes conhuntamente cu Minister di Transporte Integridad, Naturalesa, y Asuntonan di Adulto Mayor, Ursell Arends
a reuni cu e ekipo di DOW riba e topico di e planta di purificacion di awa na Bubali / ‘Rioolwaterzuiveringsinstallatie’ (RWZI).
Manera ta conoci pa basta tempo caba, e planta di purificacion di awa ta den un situacion dificil. Segun Prome Minister, DOW su presentacion a ilustra cu nan ta hopi bon prepara riba e aspecto tecnico y nan tin tur informacion. Locual cu falta ta pa percura pa yega na financiamento y escogencia di kico ta bay bira e solucion. Premier Wever - Croes a keda hopi impresiona cu e presentacion cu a haya di DOW.
E aña aki tin 3.8 miyon Florin aloca pa e mantencion urgente na e planta di Bubali. E proyecto ta ehecuta pa 61% caba y ya 85% di e material ta na Aruba. Dentro di poco lo presenta e plan cu solucion structural.
“Minister Ursell Arends ta e Minister di Gabinete Wever Croes II cu ta encarga pa busca un solucion pa RWZI. Conhuntamente cu DOW nan lo traha riba esaki y busca un solucion pa Aruba, Prome Minister a bisa”
Minister Arends na e ocasion a expresa bisando cu dentro di poco lo presenta e solucion structural pa e planta di purificacion di awa. “Nos sa cu tin hopi preocupacion cu ta biba den nos comunidad. Como e Minister encarga, conhuntamente cu DOW lo mester percura pa delinea e solucion y trece cambio pa e situacion aki den futuro”.
Minister Arends a accentua cu e situacion di e RWZI ta pone presion riba salubridad publico di nos hendenan, naturalesa y tambe riba Aruba su pilar economico cu ta turismo. “Pues, henter Aruba lo sali beneficia unabes cu tin un solucion structural pa e planta di purificacion di awa”, Minister Arends a termina bisando.
{gallery}DOW a duna Ministronan planta di RWZI na Bubali{/gallery}
