ORANJESTAD (AAN) – Rulienne Arends, Trahador Social preventivo na Fundacion Anti Droga Aruba (FADA),
den conferencia di prensa reciente, a para keto riba e hecho cu dia 26 di Juni, tabata Dia Internacional contra Abuso y Traficacion Ilicito.
E lema cu Nacionnan Uni a designa pa 2022, ta “Care & Crisis” (Cuido y Crisis). Rulienne a splica cu nan kier enfatiza riba e aspecto humanitario e aña aki, unda cu FADA ta link esaki di biaha, na e dos ultimo añanan, pa nan hopi intensivo pa loke ta Covid-19.
FADA a cuminza haya hopi yamada, sea pa e persona mes of pa famianan cu pa motibo di a perde trabao, un entrada fiho, of sernan keri cu a fayece, nan a cay bek den adiccion.
Rulienne a trece dilanti cu FADA, pa hopi aña, ta trahando riba e parti di prevencion, na unda cu for di cuater aña caba, nan ta para keto y papia cu muchanan, tocante kico tur ta e peligronan di uso di substancianan legal of ilegal, por trece pa e salud di un persona te na adulto.
Rulienne a comenta cu nan a duna charla na personanan di 80 aña, pa nan tin e informacion necesario pa esaki.
Conmemora e fecha aki no ta un trabao solamente di FADA, pero nan tin hopi partners na Aruba, cu no ta para keto y ta traha hopi duro, diariamente, pa combati adiccion. Entre nan Departamento di Douane cu tin un tarea pa combati traficacion. Rulienne a pasa palabra pa Kathleen Faro cu hunto cu su colega Denice Kelly ta traha den e area aki.
Kathleen, Management Assistant, na prome lugar a gradici FADA pa a invita Douane pa forma parti di e campaña importante aki, pa combatimento di droga. El a splica cu den Departamento di Douane, combatimento di droga ta wordo considera como nan “secondary task” y nan ta tume hopi na serio.
Seguidamente, Denice Kelly, Hondengeleider, a referi na su tarea y kico nan ta haci pa combati traficacion di droga. Denice a splica cu su tarea, entre otro, ta duna lecturanan na scol bao invitacion di FADA, pero nan trabao principal ta “Arma, droga, placa” cu e cachonan; nan tin actualmente seis cacho na pia di trabao. Nan ta traha hunto cu polis, y Guardacosta, hopi biaha.
Tambe nan ta traha na Postkantoor, ademas di controla pasaheronan cu ta drenta Aruba y sali, cu barconan crusero.
Despues a hiba palabra Michelle Lont, Trahador Social na Stichting Hunto. El a splica cu e fundacion aki ta traha mas tanto riba e parti curativo. Nan tin dos tipo di cuido cu ta ambulatorio y intramural.
Den e cuido ambulatorio nan ta brinda mucha chikito, hoben, adulto, hende grandi incluso 60 plussers.
Nan ta haci esaki door di diferente instancia cu ta referi cliente na e Fundacion. Hunto ta traha cu sector priva, hotelero, gubernamental, etc., y cu e comunidad di Aruba mes.
Ora un cliente wordo referi na Stichting Hunto, nan ta percura pa e haci diferente test, por ehemplo test di alcohol, y intake pa identifica e grado di gravedad di un persona su adiccion. E Institucion ta conta cu Psico-educacion, Psico-pedagogo, Trahador Social y hasta Psiquiatra, y e cantidad di sesion ta mara na e cliente cu nan tin nan dilanti.
