Herrick Henriquez, director di ATIA: --- "Gremio comercial no tin e poder pa haci algo riba prijs"
ORANJESTAD (AAN): Director di Aruba Trade & Industry Association (ATIA), Herrick Henriquez, a duna DIARIO un declaracion relaciona cu e ultimo desaroyonan pa loke ta situacion mundial cu e cadena di suministro y specificamente cu e posibilidad riba aumento di prijs y/of scarcedad di productonan aki na Aruba.
Henriquez a splica cu como gremio comercial nan no tin e poder pa haci algo riba prijs. Esey ta gobierno. "Gobierno por yuda eybanda manera nos a sugeri na gobierno pa cambia e manera di calcula e invoerrechten. Di un banda si e lo baha entrada di gobierno un tiki pero di otro banda, door cu tur prijs ta subi bo BBO, bo BAZV etc por yuda bo toch pasobra e prijsnan ta subiendo".
Aworaki comercio ta pendiente di e decision di gobierno y pa sa kico ta e decision. Gobierno a comunica cu gremio comercial pa medio di un carta di Prome Minister Evelyn Wever-Croes mes indicando cu nan a puntra Douane pa haci un onderzoek over di esaki pa nan bin cu un recomendacion pa gobierno, pa wak si por bay haci algo cu e manera pa calcula invoerrechten.
E director di ATIA a remarca cu te aworaki nan no a haya ningun contesta specifico. E ta kere cu gobierno aworaki ta druk cu tur e otro reformanan di e Landspakket manera entre otro e introduccion di e reforma di belasting.
Esaki ta algo andando aworaki cu por afecta comercio di Aruba awor, pero e ta kere cu Gobierno ta bezig awor cu otro cosnan. Pero "e bala ta lorando bezig cu ne", a expresa.
