ORANJESTAD (AAN): Informacion cu Royal Caribbean International a indica, ta cu na e Cruise Terminal na San Juan (Puerto Rico),
nan a cuminza haci uso e luna aki di e prome sistema pa ora pasaheronan baha, usando sistema automatiza di tecnologia biometrico. Esaki ta un etapa importante pa mehora operacion di industria crusero na e Terminalnan aki. Rhapsody of the Seas ta e prome barco di Royal Caribbean pa usa e tecnologia aki na Pier 4 di San Juan.
E proceso ta simpel. Pasaheronan ta baha y no mester ni mustra nan paspoort mas pa sali di e barco. Nan tin di djis para un rato dilanti un kiosco ekipa cu un camera, cu den algun seconde ta reconoce nan cara y ta check detayenan cu tin den file, y asina ta habri porta pa nan sigui bay. Esaki ta haci e proceso hopi rapido.
E tecnologia ta bin di US Customs and Border Protection (CBP), y nan tecnologia di comparacion facial biometrico ta haci e procedimento mas facil pa e pasaheronan ora cu nan ta bandona e barco. Pues e movimento di barco pa cas ta bay suave. Riba e viahe ey, Rhapsody of the Seas a yega bek San Juan cu mas di 2.000 pasahero.
Rhapsody of the Seas ta usando San Juan como su homeport desde April 2024, esaki a bira e prome biaha cu Royal Caribbean a implementa tecnologia di comparacion facial biometrico pa e pasaheronan di barco cu ta baha na Puerto Rico.
CBP ta pensa cu nan lanzamento exitoso di e tecnologia facial biometrico aki cu lo haci bida di tur pasahero mas facil. E herment aki lo yuda Merca cuida su frontera. E inovacion ta mehora tanto e eficiencia y seguridad, pa oficialnan di CBP ta mas envolvi y ta dal un paso dilanti pa mantene fronteranan safe.
