ORANJESTAD (AAN) – Minister Presidente, Evelyn Wever-Croes, a declara publicamente, cu Departamento di Douane lo haya un edificio completamente nobo, cu no ta bay costa gobierno ni un cen, contrario na insinuacionnan cu tin.
“Esey ta pasa ora bo ta goberna na un forma drechi; ora bo ta goberna pa yuda e pais bay padilanti. E lo tabata un edificio miyonario si e lo a sigui den tempo di AVP. Aworaki, door cu nos no tin placa pa construi un edificio, pero e empleadonan di Douane merece miho; nan ta trahando mucho tempo bao condicionnan hopi dificil, y nan ta un grupo di persona den un departamento hopi importante pa trece hopi placa aden pa gobierno.
“Y nan por trece mas placa aden pa gobierno, na un forma legitimo y husto. Desde cu mi a tuma over e cartera di infrastructura, mi a inventariza tur e trabaonan pendiente y no a mira esaki riba agenda. Mi a haya duele cu nada a wordo haci durante e añanan prome cu mi a tuma e cartera over.
“Mi a pone como un prioridad’ e edificio nobo di Douane. E momento cu e proyecto a wordo presenta, siete aña pasa, e tabata otro gobierno. Gobierno di AVP.
E lo a traha un edificio cu lo a costa hopi placa y nos no tabata tin cen pe. Aworaki, mirando e situacion, danki na e creatividad di nos empleadonan publico nan a bay busca otro alternativa”, e dignatario a relata.
Minister Presidente a duna di conoce cu e bunita edificio di Douane cu tin un bista masha bunita na lama, lo wordo traspasa pa BOHAMA, y su valor e compania aki lo use pa construi un edificio completamente nobo, moderno y cu ta cumpli cu e standardnan di infrastructura y medio ambiental, mas moderno cu tin. E ta bay tin un structura cu no mester bay uza hopi airco. E ta keda na un bon temperatura paden; un structura cu ta bay tin suficiente luz, bentana, ventilacion, mata, etc., cu ta bon pa e trahadonan. “ Asina nos ta bay traha un edificio pa Douane, completamente nobo sin cu ta costa gobierno ni un cen”, e mandatario a conclui.
