ORANJESTAD (AAN): Luna di Augustus a cuminza cu hopi conmocion na Aruba. Y esaki a keda registra den forma di 2 temblor, cu a sacudi e zona aki como 46 minuut tras di otro.
Temblor #1: E prome temblor a wordo registra Diamars 1 Augustus 2023 pa 8:49 am, y e epicentro a wordo descubri na 13.06º Nort, y 70.43º West. Esaki ta apenas 63 km Noordwest for di Faro di California na Westpunt di Aruba.
E magnitud di e temblor aki a registra na 2.9º riba Scala di Richter, y e epicentro tabata na un profundidad di 35.4 km bao suela.
Temblor #2: E di dos temblor a wordo registra Diamars 1 Augustus 2023 pa 9:35 am, y e epicentro a wordo localiza na 12.77º Nort, y 70.44º West. Esaki ta poni na un distancia mas cerca, esta solamente 45 km West-Noordwest for di Faro di California na Westpunt di Aruba.
E magnitud di e di dos temblor aki ta mas fuerte, esta di 3.1º riba Scala di Richter, y e epicentro tabata na un profundidad di 29.6 km bao suela.
No ta conoci si acaso tin hende cu a sinti esaki na Aruba, pero hecho ta cu e mainta ey tabatin hopi biento y kizas e sonido produci pa hopi biento por ‘tapa’ e sonido di un temblor.
E dos temblornan aki tin un distancia di solamente 32 kilometer leu di epicentro pa epicentro.
Esaki no ta e prome biaha cu dos temblor ta registra manera “bisiña” di otro cerca di Aruba. Na Juli 2022 caba tambe tabatin algun temblor cu a keda registra cerca di otro, pero e biaha ey na parti zuidwest riba lama for di San Nicolas di Aruba.
