ORANJESTAD (AAN): Tanto Diamars 29 di September, y tambe Diaranson 30 di September a registra dos temblor leve den e area West y tambe Zuidwest di Aruba.
TEMBLOR #1: E prome tabata un temblor cu magnitud liviano di 2.8º riba Scala di Richter, a wordo registra Diamars 29 di September, den oranan di atardi riba lama grandi pabao di Aruba.
Tabata exactamente 2:40 pm, cu e epicentro a wordo registra na 12.79º Nort y 71.27º West. Esaki ta exactamente 133 km West-Noordwest for di Beach di Arashi na Noord (Aruba). E ta igual cu 137 km West-Noordwest di Wilhelmina Park na Oranjestad (Aruba).
E epicentro tabatin un magnitud di 2.8º, y e tabata na un profundidad di 24.9 km bao di subsuelo di lama.
Como cu e tabata di magnitud leve, e temblor aki a wordo registra solamente via di aparatonan sensitivo di Seismogram.
TEMBLOR #2: E di dos tabata un temblor tambe di magnitud liviano di 2.7º riba Scala di Richter, y a wordo registra Diaranson 30 di September, den oranan di marduga riba lama Zuidwest di Aruba.
Tabata exactamente 3:21 am, cu e epicentro a wordo registra na 11.40º Nort y 71.11º West. Esaki ta exactamente 170 km Zuidwest for di Wilhelmina Park na Oranjestad (Aruba). E ta igual cu 102 km West-Zuidwest di Punto Fijo na estado Falcon (Venezuela).
E epicentro tabatin un magnitud di 2.7º y tabata na un profundidad di 31.3 km bao di subsuelo di lama.
Como cu e tabata di magnitud leve, e temblor aki a wordo registra solamente via di aparatonan sensitivo di Seismogram.
